کرکٹ کھیلنے پر والد سے بہت ’کُٹ‘ کھائی ہے :سرفرازاحمد
کراچی(سپورٹس ڈیسک )قومی ٹیم کے سابق کپتان سرفراز احمد نے انکشاف کیا ہے کہ کرکٹ کھیلنے پر والد سے بہت ‘کُٹ’ کھائی ہے ۔۔
میری شادی کی تاریخ 3 بار تبدیل ہوئی تھی، شادی کے ساتھ زمبابوے کیخلاف میچ کھیل کر پاکستان میں انٹرنیشنل کرکٹ کو ویلکم کیا، نجی ٹی وی کے پروگرام میں انہوں نے کہا کہ دوستو نے کہا کہ کراچی ڈیفنس میں منتقل ہو جاؤ لیکن میری بفر زون سے انسیت ہے ، جان پہچان ہے ، جس گلی میں میں کھیلتا تھا میرا بیٹا بھی وہیں کھیلتا ہے ۔ کرکٹ کھیلنے پر والد سے بہت ‘کُٹ’ کھائی ہے ، ہمارے تو کُٹ کھانے کے مشہور مشہور قصے بھی ہیں، ابا گراؤنڈ سے مارتے ہوئے گھر لے کر آتے تھے ، میں نے قرآن حفظ کیا ہے ، امام صاحب کے بیٹے سے میری دوستی تھی، ان کے گھر میں ٹی وی تھا، تو میں سکول کی بجائے اس کے گھر جا کر میچ دیکھتا تھا، تو ایک دن ابا امام صاحب کو ناشتہ دینے آ گئے اور ہم وہاں بیٹھ کر میچ دیکھ رہے تھے ، امام صاحب کو پتا نہیں تھا تو انہوں نے ابا کو میرے بارے میں بتایا، پھر وہ ہمیں مارتے ہوئے گھر لے کر گئے ۔سرفراز احمد کا کہنا تھا کہ کوئی آپ کے بارے میں بات کرتا ہے تو فرق ضرور پڑتا ہے ، ایسا نہیں ہو سکتا کہ باہر میچ کھیلنے گئے اور موبائل نہ دیکھیں، کوئی تنقید کرتا ہے تو دکھ ہوتا ہے ، جب آپ اچھا کرتے ہیں لوگ ہیرو بناتے ہیں۔انھوں نے دیگر کھلاڑیوں کے حوالے سے کہا ‘‘بطور کپتان اور کھلاڑی اتار چڑھاؤ دیکھے ہیں، شاہین آفریدی کو مشورہ دیتا ہوں غصہ کم کریں اور اپنی توانائی بچائیں۔
