پی ایس ایل کے بقیہ میچز کا فیصلہ کل تک ہونے کا امکان
راولپنڈی،لاہور(سپورٹس رپورٹر،مانیٹرنگ ڈیسک )پی ایس ایل 10 کے بقیہ 8 میچز کا فیصلہ کل تک ہونے کا امکان ہے ۔پی سی بی ذرائع کے مطابق پی ایس ایل کے باقی میچز راولپنڈی اور لاہور میں ہونگے۔۔
جبکہ فائنل قذافی سٹیڈیم میں کھیلا جائیگا۔ذرائع کے مطابق بین الاقوامی مصروفیات اور نیشنل ڈیوٹی کے باعث غیر ملکی کھلاڑی دستیاب نہیں ہونگے اور پی سی ایل ٹیموں کا انحصار مکمل طور پر مقامی کھلاڑیوں پر ہو گا۔دوسری طرف قومی ٹیم کے سابق ٹیسٹ کرکٹر باسط علی نے پی ایس ایل کے بقیہ میچز بنگلہ دیش میں کرانے کی تجویز دیدی۔ایکس پر جاری بیان میں انہوں نے کہا کہ پی ایس ایل کے بقیہ میچز دبئی کے بجائے بنگلہ دیش میں کرانے چاہئیں ، بنگلہ دیش ہمارا بھائی ہے اور وہاں لوگ بھی بہت آتے ہیں میچ دیکھنے ، پاکستان کرکٹ بورڈ نے ایسا کیا تو دیکھنا کیسے تالیاں بجتی ہیں۔خیال رہے کہ بھارتی جارحیت کے باعث پی سی بی نے پی ایس ایل غیرمعینہ مدت کے لیے معطل کرنے کا اعلان کیا تھا۔تاہم گزشتہ روز پاکستان سپر لیگ کی انتظامیہ نے فرنچائزز کو غیر ملکی کھلاڑیوں کو دبئی میں روکنے کا کہہ دیا تھا۔ ذرائع کاکہنا تھاکہ فرنچائزز سے مقامی کھلاڑیوں کو بھی ذہنی طور پر تیار رہنے کا کہا گیا اور پیغام دیا گیا کہ ممکن ہے کہ پی ایس ایل کے لیے اسلام آباد میں اکٹھا ہونا پڑے ۔
