پی سی بی کا ڈومیسٹک کیلنڈر کا اعلان، چیمپئنزکپ ختم
راولپنڈی (سپورٹس رپورٹر)پاکستان کرکٹ بورڈ نے 26-2025 کے ڈومیسٹک سیزن کا تفصیلی شیڈول جاری کر دیا ہے۔
ڈومیسٹک کرکٹ سیزن سے چیمپئنز کپ کو ختم کر دیا۔واضح رہے کہ ڈومیسٹک کرکٹ سیزن میں چیمپئنز کپ کو گزشتہ برس متعارف کروایا گیا تھا۔ سیزن کا آغاز 15 اگست کو حنیف محمد ٹرافی سے ہو گا جبکہ پاکستان کا سب سے بڑا فرسٹ کلاس ٹورنامنٹ "قائد اعظم ٹرافی" 22 ستمبر سے 7 نومبر تک اسلام آباد اور راولپنڈی میں کھیلا جائے گا۔ پی سی بی کے مطابق حنیف محمد ٹرافی میں 12 ٹیمیں شریک ہوں گی اور یہ مقابلے کراچی، ملتان، بہاولپور اور رحیم یار خان میں ہوں گے ۔ ٹورنامنٹ کی سر فہرست دو ٹیمیں قائد اعظم ٹرافی میں کوالیفائی کریں گی جس میں مجموعی طور پر 8 ٹیمیں حصہ لیں گی اور 29 میچز پر مشتمل لیگ فارمیٹ میں مقابلے ہوں گے ۔ قومی ٹی 20 ٹورنامنٹ کا انعقاد یکم سے 12 مارچ 2026 تک فیصل آباد میں ہو گا۔ رواں سیزن میں نیشنل ٹی 20 کے لیے کوالیفائنگ راؤنڈ بھی متعارف کرایا گیا ہے جس میں 10 ٹیمیں حصہ لیں گی اور سر فہرست دو ٹیمیں سپر 10 مرحلے میں جائیں گی۔ سپر 10 میں 8 ٹیمیں پہلے سے براہ راست شامل ہوں گی ۔ ڈومیسٹک سیزن میں انڈر 15، انڈر 17 اور انڈر 19 ریجنل ٹورنامنٹس بھی شامل ہیں تاکہ نوجوان ٹیلنٹ کو مواقع دئیے جا سکیں۔ اس کے علاوہ چار ڈیپارٹمنٹل ٹورنامنٹس بھی سیزن کا حصہ ہیں جن میں پریذیڈنٹ ٹرافی، پریذیڈنٹ کپ، گریڈ II اور گریڈ III شامل ہیں۔ ڈائریکٹر ڈومیسٹک کرکٹ آپریشنز عبداﷲ خرم نے کہا کہ حنیف محمد ٹرافی کے نمایاں کھلاڑی قائداعظم ٹرافی میں بطور گیسٹ پلیئرز شامل ہو سکیں گے اور انہیں ڈومیسٹک کنٹریکٹس دئیے جائیں گے ۔
