دورہ بنگلادیش کیلئے پاکستان کے 15 رکنی دستے کی نقاب کشائی
لاہور(سپورٹس ڈیسک)دورہ بنگلا دیش کیلئے پاکستان کے پندرہ رکنی سکواڈ کا اعلان کردیا گیا جب کہ بنگلہ دیش کے خلاف گزشتہ سیریز میں شامل 16 میں سے کچھ کھلاڑیوں کو باہر کر کے دیگر کو ٹیم میں شامل کیا گیا ہے
۔بابراعظم، محمد رضوان اور شاہین شاہ آفریدی کو ایک مرتبہ پھر 15 رکنی سکواڈ میں جگہ نہیں ملی۔رپورٹ کے مطابق اعلان کردہ سکواڈ میں سلمان علی آغا کو کپتان برقرار رکھا گیا ہے ، ان کے ساتھ نائب کپتان نہیں رکھا گیا۔کرکٹرز حسن علی، نسیم شاہ، شاداب خان، عرفان خان نیازی اور حارث رؤف کو باہر کردیا گیا۔اس کے علاوہ 4 کرکٹرز سفیان مقیم، احمد دانیال، سلمان مرزا اور محمد نواز شامل کئے گئے ہیں، پاکستان اور بنگلا دیش کے درمیان تین ٹی ٹونٹی میچز 20 سے 24 جولائی تک ڈھاکا میں کھیلے جائیں گے ۔سکواڈ میں تجربہ کار اور نوجوان کھلاڑیوں کا امتزاج رکھا گیا ہے جبکہ محمد حارث اور صاحبزادہ فرحان کو وکٹ کیپرز کے طور پر شامل کیا گیا ہے ۔پاکستان کرکٹ ٹیم 16 جولائی کو بنگلا دیش پہنچے گی جہاں دونوں ٹیموں کے مابین ٹی 20 سیریز کا آغاز 20 جولائی سے ہوگا۔ شیڈول کے مطابق پہلا ٹی ٹونٹی میچ 20 جولائی کو ڈھاکا میں کھیلا جائے گا، دوسرا میچ 22 جولائی جبکہ تیسرا میچ 24 جولائی کو شیڈول ہے ۔دورہ بنگلا دیش اور ویسٹ انڈیز کے لیے پاکستان کرکٹ سکواڈ کا تربیتی کیمپ آج سے شروع ہوگا۔تربیتی کیمپ 15 جولائی تک جاری رہے گا، پاکستان کرکٹ ٹیم اگلے روز 16جولائی کو ڈھاکہ پہنچے گی۔پاکستانی سکواڈ میں سلمان علی آغا (کپتان)، ابرار احمد، احمد دانیال، فہیم اشرف، فخر زمان، حسن نواز، حسین طلعت، خوشدل شاہ، محمد عباس آفریدی، محمد حارث (وکٹ کیپر)، محمد نواز، صاحبزادہ فرحان (وکٹ کیپر)، صائم ایوب، سلمان مرزا اور سفیان مقیم شامل ہیں۔
