ٹی ٹونٹی ورلڈکپ: 25 کھلاڑی تیار، تب تک یہی کھیلیں گے : سلمان
لاہور(سپورٹس ڈیسک)پاکستان ٹی ٹونٹی ٹیم کے کپتان سلمان علی آغا کا کہنا ہے کہ ٹی ٹونٹی ورلڈ کپ کو ذہن میں رکھتے ہوئے پاکستان ٹیم مینجمنٹ نے 25 کھلاڑیوں کا پول تیار کیا ہوا ہے۔
پاکستان کرکٹ ٹیم کی بنگلا دیش روانگی سے قبل قومی ٹیم کے آخری پریکٹس سیشن کے موقع پر میڈیا سے گفتگو میں سلمان علی آغا نے کہا کہ ان کی کوشش ہے کہ ٹیم کے پاس پلیئرز ہونے چا ہئیں جو ہر کسی کو کسی وقت بھی ری پلیس کرسکیں اور اس سوچ کے ساتھ ہی اپنی بینچ سٹرینتھ بھی تیار کررہے ہیں ۔ایک سوال پر انہوں نے کہا کہ مستقبل کا پلان کرتے ہوئے 25 کھلاڑیوں کا پول تیار کیا ہوا ہے ، ورلڈ کپ تک ان 25 کھلاڑیوں کو ہی کھیلتے دیکھیں گے ۔سلمان آغا نے کہا کہ شاہین آفریدی ، بابر اعظم اور رضوان سینئر پلیئرز ہیں اور 25 پلیئرز کے پول میں ہیں، شاہین آفریدی کی پرفارمنس کسی کو گنوانے کی ضرورت نہیں،شاداب کے انجرڈ ہونے کی وجہ سے نواز کو شامل کیا گیا ہے ۔ انہوں نے مزید کہا کہ پرفارمنس اوپر نیچے ہوتی ہے کھلاڑی کی صلاحیت کو بھی دیکھنا ہوتا ہے ۔آنے والے میچز کی کنڈیشنز کو ذہن میں رکھ کر ہی کراچی میں کیمپ لگایا گیا کیوں کہ یہاں سپن کی اچھی کنڈیشنز تھیں، ہم مستقبل کی سیریز کیلئے بھرپور تیاری کے ساتھ جا رہے ہیں ۔ میرا فوکس جو سامنے ہوتا ہے اس پر ہوتا ہے ، مجھے یہ دیکھنا ہے کہ سیریز میں اپنے پلیئرز سے بہترین کارکردگی کیسے لینا ہے ۔ ان کا مزید کہناتھا کہ ایک دو ماہ سے کچھ ثابت نہیں ہوتا، جہاں پاکستان کرکٹ کو ہونا چاہیے میں اس کے لیے کچھ بھی کرنے کو تیار ہوں۔
