بنگلہ دیش سے پہلا ٹی 20 آج ، پاکستان کا جارحانہ کھیل کا پلان
ڈھاکا(سپورٹس ڈیسک )پاکستان اوربنگلہ دیش کے درمیان ٹی 20سیریزکامیلہ آج سے شیربنگلہ سٹیڈیم ڈھاکامیں سجے گا،جس کیلئے ٹرافی کی رونمائی کردی گئی ہے ،ڈھاکاکے ہوٹل میں ہونیوالی تقریب رونمائی میں دونوں ٹیموں کے کپتانوں کے شرکت کی۔۔۔
میچ شام 7بجے شروع ہوگا جبکہ ڈھاکا میں پریس کانفرنس کرتے ہوئے قومی ٹیم کے کپتان سلمان علی آغاز نے کہا کہ ٹیم پر کسی قسم کا کوئی دباؤ نہیں ہے اور تمام فوکس اس بات پر ہے کہ بنگلہ دیش کے خلاف سیریز میں اچھی اور مثبت کرکٹ کھیلی جائے ۔انہوں نے بابراعظم اور محمد رضوان کو ورلڈ کلاس کرکٹرز قرار دیتے ہوئے کہا کہ دونوں نے ہمیشہ پاکستان کے لیے بہترین کارکردگی دکھائی ہے ۔ ٹی ٹونٹی فارمیٹ ہر 6 ماہ اور ہر سال کے ساتھ بدل رہا ہے اور اس بدلتے فارمیٹ کے مطابق ہم جارحانہ کرکٹ کھیلنا چاہتے ہیں، انہوں نے اعتماد ظاہر کیا کہ ٹیم میں ویسے ہی کھلاڑی موجود ہیں جیسی کرکٹ ہم کھیلنا چاہتے ہیں۔ کنڈیشنز کسی بھی میچ میں فیصلہ کن کردار ادا کرتی ہیں اور ہمیں بنگلہ دیش کی کنڈیشنز کا بخوبی اندازہ ہے ۔ کئی پاکستانی کھلاڑی بنگلہ دیشی لیگ میں کھیل چکے ہیں جس کی وجہ سے یہاں کے ماحول میں کھیلنے کا تجربہ رکھتے ہیں۔انہوں نے بنگلہ دیشی ٹیم کو ایک مضبوط حریف قرار دیتے ہوئے کہا کہ وہ دنیا کے ہر گراؤنڈ پر مخالف ٹیم کے لیے چیلنج بنتی ہے تاہم پاکستانی ٹیم میچ کی صورتحال اور کنڈیشن کے مطابق کھیلنے کی مکمل تیاری رکھتی ہے ۔کپتان کے مطابق ڈھاکا کی کنڈیشنز کے پیش نظر کراچی میں کیمپ کے دوران خصوصی پچز تیار کی گئیں تاکہ کھلاڑی ان حالات کے مطابق خود کو تیار کرسکیں۔ کیمپ میں سناریو بیس میچز کے ذریعے کھلاڑیوں کی سکلز کو بہتر بنانے پر بھرپور کام کیا گیا۔
