عوام کی خدمت کا صلہ اللہ دیتا ہے:نواز شریف:معیار ہی ہمارا اصل امتحان :مریم نواز
لاہور (دنیا نیوز،اے پی پی )مسلم لیگ (ن) کے صدر نواز شریف اور وزیراعلیٰ مریم نواز سے پنجاب اسمبلی کے ارکان نے ملاقات کی۔ فیصل آباد، چنیوٹ، ٹوبہ ٹیک سنگھ اور جھنگ کے اضلاع سے تعلق رکھنے والے ارکان ملاقات کرنے والوں میں شامل تھے ۔
ملاقات میں ملک کی مجموعی صورتحال، پنجاب میں ترقیاتی عمل اور عوام کی خدمت کے منصوبوں پر غور کیاگیا۔ نوازشریف نے گفتگو کرتے ہوئے کہا نیت ٹھیک ہو گی تو اللہ تعالیٰ کی مدد آئے گی۔ مخلوق خدا کی خدمت سب سے بڑی عبادت ہے ۔ عوام کی خدمت کا صلہ اور انعام اللہ تعالیٰ دیتا ہے ۔ معاشی بہتری اور مہنگائی میں کمی ملک وقوم کی بہتری کے اشارے ہیں۔ انہوں نے کہا 30 ہزار پر آنے والی سٹاک ایکسچینج آج ایک لاکھ20 ہزار پوائنٹس کی حدوں کو چھو چکی ہے ۔ معاشی ترقی کے تسلسل سے ہی عوام کے حالات بدل سکتے ہیں۔ اللہ کا شکر ہے پاکستان کا تنزلی کی طرف جاری سفر رک گیا۔ نوازشریف نے کہا وزیراعظم شہباز شریف بڑی محنت کر رہے ہیں، اداروں اور نظام کی اصلاح پر ٹھوس پیش رفت جاری ہے ۔ مریم نواز نے وزیراعلیٰ کے طور پر میرا اور پارٹی کا سر فخر سے بلند کیا ہے ۔ نیک نیتی اور محنت سے کام کریں تو اللہ تعالیٰ بھی مدد فرماتا ہے ۔ ارکان اسمبلی نے پنجاب میں ترقیاتی کاموں اور عوامی منصوبوں پر وزیراعلیٰ مریم نوازشریف کو خراج تحسین پیش کیا۔ مریم نواز نے ارکان پنجاب اسمبلی سے اظہار تشکرکرتے ہوئے کہا عوامی خدمت نواز ، شہباز شریف اور مسلم لیگ (ن)کی پہچان ہے ، معیار اور روایت ہی ہمارا اصل امتحان ہے ۔ انہوں نے کہا قیادت کی رہنمائی اور آپ سب کی تائید و حمایت ہماری قوت اور کامیابی کی ضمانت ہے ۔ ملاقات میں عوامی فلاح کے منصوبوں اور مستقبل کی سیاسی حکمت عملی پر مشاورت بھی کی گئی۔
