سُلگتے ارمان، بہکی ہوئی خواہشات

ہم جیسے سُست روی کے شکار اور نکمّے آدمیوں کی زندگیوں میں دو چیزوں نے آسانیاں پیدا کیں۔ ایک کتابوں نے، جو نہ ہوتیں تو زندگی میں سہارا کس چیز کا رہ جاتا۔ دوسری انٹرنیٹ کی ایجاد نے کہ اس نے فاصلے کم کر دئیے اور دور دراز دیہاتوں کو بھی بڑے سے بڑے شہر سے ملا دیا۔
سمرسیٹ مام (Somerset Maugham) کا ایک مقولہ ہے کہ جس نے پڑھنے کا شوق پیدا کر لیا اُس نے زندگی کی تمام تکلیفوں سے اپنے آپ کو محفوظ کر لیا۔ کتابیں ساتھ ہوں تو اکیلا پن محسوس نہیں ہوتا‘ اور بہت ساری چیزوں سے آدمی بے نیاز ہو جاتا ہے۔ سمرسیٹ مام جہاں بھی سفر کرتے ڈھیر سی کتابیں اپنے ساتھ لے جاتے۔ وہ شرمیلے انسان تھے اور زندگی بھر شادی نہ کی۔ سفر بہت کرتے تھے اور اُن کا ہمسفر ایک مرد دوست ہوا کرتا تھا۔ خواتین سے بھی دوستی ہوتی لیکن ادبی قسم کی۔ صفِ اول کے ناول نگار نہ تھے لیکن مقبولِ عام لکھاری ضرور تھے۔ اُن کی کتابوں کی سرکولیشن بہت ہوتی اور اُس سے انہوں نے اچھا خاصا پیسہ کمایا۔ آسودہ ہونے کی وجہ سے دوران سفر بڑے بڑے ہوٹلوں میں رہتے، مزاج اور شوق بھی امیروں جیسے تھے۔ صرف حسن سے ادا نہیں آتی پیسوں سے بھی ادائیں بدل جاتی ہیں۔
مام اپنی کتابیں لانگ ہینڈ (long hand) میں لکھتے تھے یعنی کاغذ ہوا توقلم سے تحریر شروع کی۔ دنیا میں جو بڑے لکھاری رہے ہیں سب نے ایسا ہی کیا۔ ہم جیسے لوگ لکھاری تو نہیں کہلا سکتے لیکن صحافت کے میدان میں عرصۂ دراز سے ہماری آنیاں جانیاں رہیں۔ ہمارے لئے آسانی انٹرنیٹ نے پیدا کی۔ ایک زمانہ تھا کہ صحافی ہونے کے لئے ضروری تھاکہ رہائش اسلام آباد، لاہور یا کراچی جیسے شہروں میں رکھی جائے کیونکہ وہاں ہی وہ سہولیات میسر تھیں‘ جو صحافتی کمیونیکیشن یا رابطوں کے لئے ضروری ہوتیں۔ جب کالم نگاری شروع کی تو کالم پی آئی اے ڈاک کے ذریعے لاہور میں اپنے دفتر کو بھیجتے۔ بہت سالوں بعد فیکس مشین آئی اور جب پہلی دفعہ دیکھی تو حیرانی ختم نہ ہوئی کہ یہ کیا عجیب چیز ہے کہ کاغذ ایک طرف سے ڈالا اور کہیں دور دوسرے شہر میں اُس جیسی دوسری مشین سے باہر نکل آیا۔ فیکس کے استعمال کے لئے بھی ضروری تھا کہ کسی نسبتاً بڑے شہر میں رہائش ہو۔ اُس وقت تو چکوال میں ٹیلی فون کی ڈائریکٹ ڈائلنگ بھی نہ تھی۔ راولپنڈی کال ملانی ہوتی تو آپریٹر صاحب سے کہا جاتا اور اُن کی مہربانی ہوتی تو کال جلد مل جاتی۔ اُس زمانے میں محکمہ ٹیلی فون کے آپریٹر چھوٹے شہروں میں بڑی تڑّی سے چلتے تھے اور لوگ اُنہیں سلام کرتے تھے۔ بڑے دکاندار شاید ماہانہ سلامی بھی پیش کرتے کیونکہ اُن کی نوازش کے بغیر کال نہ ملتی۔ جب ڈائریکٹ ڈائلنگ آئی ہم سمجھے کہ انقلاب آ گیا۔ لیکن پھر بھی صحافت کرنے کے لئے بڑے شہر میں رہنا ضروری تھا۔ بہت عرصے تک ہمارے گاؤں میں بجلی نہ تھی۔ سینیٹر سرتاج عزیز سے گزارش کی اور اُنہوں نے اپنے ترقیاتی فنڈز میں سے مہربانی کی اور بھگوال میں 1990ء میں بجلی آئی۔ ٹیلی فون ایکسچینج بعد میں بنا۔
1995ء میں آکسفورڈ یونیورسٹی میں تین ماہ کی فیلوشپ ملی۔ اُس وقت کمپیوٹر نئے نئے آئے تھے اور میں نے دیکھا کہ ہر طالب علم کو کمپیوٹر کے استعمال کی روانی نہ تھی۔ مائیکروسافٹ کا MS Word سسٹم‘ جو آج کل عام ہے اور جس نے کمپیوٹر کے استعمال کو بہت آسان کر دیا ہے‘ تب ایجاد نہ ہوا تھا۔ لہٰذا ہم جیسے اناڑیوں کے لئے کمپیوٹر کا استعمال خاصا مشکل تھا۔ لیکن اس میدان میں جو حیرت انگیز تبدیلیاں آئی ہیں‘ دنیا کی تاریخ میں سنگ میل کی حیثیت رکھتی ہیں۔ کمپیوٹرز نے کیا کچھ نہیں کر دکھایا‘ لیکن ہمیں اپنی زندگی سے سروکار ہے۔ ہماری زندگی میں آسانیاں پیدا ہو گئی ہیں۔ گاؤں میں بیٹھے دنیا بھر کی موسیقی سُن سکتے ہیں۔ یُوٹیوب لگاؤ تو موسیقی کے سارے خزانے سامنے ہوتے ہیں۔ بٹن دباؤ تو واگنر (wagner) سن سکتے ہو۔ ایسی موسیقی‘ جو کبھی حاصل نہ کر سکتے تھے اور جسے سننے کا کبھی موقع ہاتھ نہ آتا‘ اب سامنے پڑی ہے۔ گاؤں میں بیٹھ کے کالم نویسی ہو سکتی ہے۔ درخت تلے لیپ ٹاپ کھولا اور کالم لکھ ڈالا۔ دُنیا بھر کے اخبارات کمپیوٹر سکرین پہ میسر ہیں۔ فیس بک جیسی چیزوں سے کوئی واسطہ نہیں اور گھنٹوں سکرین کے سامنے بیٹھنے کا بھی شوق نہیں‘ لیکن موسیقی اور لکھائی کی آسانی نے کئی لحاظ سے زندگی بدل کے رکھ دی ہے۔ صحیح آسائشیں یہی ہیں اور اِن کے بغیر زندگی ادھوری رہ جائے۔
میں حیران ہوتا ہوں کہ ہمارے ہاں اب تک دیہات میں رہنے کا رواج شہر کے لوگوں میں زیادہ پیدا نہیں ہوا۔ جیسا ہم جانتے ہیں برطانیہ جیسے ملک میں بہت سارے آرٹسٹ قسم کے لوگ دیہات میں رہنا پسند کرتے ہیں۔ یہ ضرور ہے کہ وہاں آنے جانے کی سہولیات میسّر ہیں۔ آپ دیہات میں رہیں تو باآسانی لندن، پیرس اور نیویارک آ جا سکتے ہیں۔ جب میں آکسفورڈ میں تھا تو وہاں دیکھا کہ آکسفورڈ ٹیوب نامی بس سروس لندن تک چلتی تھی۔ اُس پہ آپ لندن گئے، سیر سپاٹا کیا ، رات گئے بس میں بیٹھے اور آکسفورڈ واپس پہنچ گئے۔ یہاں پہ اب بھی یہ روش ہے کہ بڑے شہروں میں رہا جائے حالانکہ بڑے شہروں کی جو حالت بن چکی ہے وہ ہمارے سامنے ہے۔ جب 1978ء میں ہم اسلام آباد گئے تو چھوٹا سا شہر تھا۔ کوئی مقام نہ تھا جو کار پہ پانچ منٹ کی مسافت سے دور ہو۔ اب بے ہنگم شہر بن چکا ہے اور اتنا پھیل رہا ہے کہ جنوب کی طرف چکری کے قریب آتا جا رہا ہے اور کچھ سالوں بعد بلکسر اور چکوال بھی اسلام آباد کے مضافات (suburb) کہلائیں گے۔ یہ جو فتح جنگ والا نیا ایئرپورٹ بن رہا ہے‘ میرے گاؤں بھگوال سے زیادہ قریب ہو گا بہ نسبت اسلام آباد کے۔ نیلہ دلہہ انٹرچینج نے یہ سہولت پیدا کی ہے کہ گاؤں سے اُٹھوں تو ایک گھنٹہ پانچ منٹ میں آبپارہ پہنچ جاؤں۔
بہرحال یہ حقیقت ذہنوں سے اُوجھل نہیں ہونی چاہیے کہ جہاں دنیا اور اُس کی ایجادات نے ہماری زندگیاں آسان کی ہیں وہاں ہم نے اپنے ملک کا حلیہ بگاڑ کے رکھ دیا ہے۔ اب ہم عمر کے اس حصے میں ہیں کہ نہ کوئی زیادہ خواہشات ہیں نہ کوئی ملک کو سنوارنے کی اتنی تڑپ باقی ہے۔ اب یہ خیال گھر کرتا جا رہا ہے کہ بیشتر چیزوں میں ہم نے ایسے ہی رہنا ہے۔ یہاں کوئی بڑی تبدیلی نہیں آنی۔ ہم بے ہنگم معاشرہ بن چکے ہیں اور شاید بے ہنگم رہنا ہماری تقدیر میں ہے۔ 68 سال کی عمر میں بہت کچھ دیکھ چکے اور یہ بھی دیکھا کہ ہر خرابی نے مزید خرابیاں پیدا کیں۔ حکمرانی بھی ہماری ڈھیلی ہے اور قیادت کی سطح کا ذکر نہ ہی کیا جائے تو بہتر ہے۔ لیکن اب بھی خیال رہتا ہے کہ لاہور جائیں تو ڈھنگ کی شام تو گزار سکیں، کچھ تو جگہیں ہوں جہاں ہلکی روشنی میں اچھی موسیقی سُنی جا سکے اور اچھی شکلیں دیکھنے کو ملیں۔ ایک زمانے میں ایسی جگہیں ہوا کرتی تھیں‘ لیکن ہمارے اُلٹے نظریوں نے اُنہیں اُجاڑ کے رکھ دیا۔ اب پاکستان میں حالت یہ ہے کہ شام گزارنی ہو تو کسی کے گھر جانا پڑتا ہے۔ کوئی ایسی جگہ نہیں میسّر جہاں آدمی جائے، پسند کی چیزوں کو دیکھے، اچھا وقت گزارے اور جھومتے ٹہلتے، کوئی گانا گنگناتے، ہوٹل کو واپس لوٹے۔ یہ نہیں کہ بہکانے والی چیزیں مملکتِ خداداد میں دستیاب نہیں۔ لیکن اِن کے حصول کے لئے بہت تردد کرنا پڑتا ہے۔ یوں لگتا ہے کہ آدمی باقاعدہ مہم پہ جا رہا ہے۔ یہاں فون کرو وہاں فون کرو، پورا دردِ سر کا اہتمام کرنا پڑتا ہے۔ دل افسردہ پڑ جاتا ہے جب یہ خیال آتا ہے کہ ایسی مہم جوئی میں کوئی آسانیاں پیدا نہ ہوں گی۔ ہمارے حالات ایسے ہی رہیں گے۔