ہر پہر کا آسمان

چھٹی کا دن تھا،میں قدرے تاخیرسے بیدار ہوا، ناشتے کے بعد اخبارات کے مطالعے میں مصروف تھا کہ موبائل کی گھنٹی بجی۔ جی بسم اللہ ۔۔۔کون ؟ موبائل کی سکرین پر نام نہیں تھامگر آواز خاصی مانوس تھی، سواگلے پل میں انہیں پہچان چکا تھا ۔ ہمدمِ دیرینہ آصف ہمایوں اپنے مخصوص دھیمے انداز میں بول رہے تھے : جناب کہاں ہیں؟

بتایا : اتوار کے روز کہا ںجا سکتا ہوں، گھر پر ہوں۔

اچھا تو پھر دروازہ کھول دیجئے ، میں آپ کے گھر کے دروازے پر ہوں۔

میں نے حیرت اور سرعت سے دروازہ کھولا تو سامنے آصف ہمایوں اپنے ایک دوست کے ساتھ کھڑے مسکرا رہے تھے۔بیٹھتے ہی انہوں نے ایک بیگ سے کتاب نکالی اور میرا نام لکھ کر پیش کرتے ہوئے بولے : فقیر کا یہی اثاثہ ہے، قبول کیجیے۔

اب میرے سامنے '' ہر پہرکا آسماں ‘‘ تھا۔

برسوں بعد آصف ہمایوں سے ایسے ملاقات ہو گی، میرے وہم گمان میں بھی نہ تھا۔دیر تک ہم گئے دنوں کو یاد کرتے رہے۔ایسے میں اطہر ناسک جسے مرحوم کہتے کانپ اٹھتا ہوں ، بے طرح یاد آیا۔

آصف ہمایوں سے میری ملاقات اطہر ناسک کی وساطت سے ہوئی تھی۔آصف ہمایوں کو نمایاں رہنے کا شوق کبھی نہیں رہا۔دوستوں میں وہ نہایت دھیمے مزاج کے آدمی ہیں۔ٹھہر ٹھہر کر اور گہری بات کرنا ان کے مزاج کا حصہ ہے۔ان کے موضوعات میں مابعد الطبیعاتی فکر،فلسفہ ،تصوف،روحانیت ،انسان اور مظاہرِ کائنات شامل ہیں۔

آصف ہمایوں نے لاہور میں جنم لیا ۔ تعلیمی مدارج بھی یہیں طے کیے۔ معاشریات اور قانون کی ڈگریاں حاصل کیںاور پنجاب یونیورسٹی لاہور میں تدریس کے شعبے سے منسلک ہوگئے۔ آمرانہ دورِ حکومت میں چند دیگر اساتذہ کی طرح انہیں بھی ملازمت سے ہاتھ دھونا پڑے۔ وزارتِ داخلہ کے ایک ریسرچ پراجیکٹ پر کام کیا۔اس دوران بچوں کی جیلوں کے علاوہ جرائم پیشہ افراد کی جیلوں کا سروے کیا۔ لاہورثانوی تعلیمی بورڈ کے سیکرٹری بھی رہے، پھر مختلف تعلیمی اداروں میں تدریسی فرائض انجام دیتے ہوئے بطور پرنسپل ریٹائرہوگئے ۔اِن دنوں ایک نجی یونیورسٹی سے وابستہ ہیں۔آصف ہمایوں میرے اُس زمانے کے دوست ہیں جب میں لاہور میں نیا نیاآیا تھااور مختلف مقامی اخبارات کے علاوہ ریڈیو اور فلم کے لیے لکھنے کی جدو جہد میں مصروف تھا۔ عجب بھاگ دوڑ کا زمانہ تھا۔ ملتان کے دوستوں میں اطہر ناسک اور خواجہ ندیم اسلم ایڈہاک لیکچرار تعینات ہو چکے تھے۔اطہر ناسک نے صادق آباد سے لیکچرر سلیکشن بورڈ میں تبادلہ کرا لیا تھا۔ رضی الدین رضی اور طفیل ابنِ گل پہلے سے یہاں موجود تھے۔ ہماری شامیں اکٹھی گزرتیں۔لکشمی چوک میں قائم ہمارے اخبار کے دفتر سے لے کر رائل پارک کے چائے خانوں اور پھر حیدر بلڈنگ ، پاک ٹی ہائوس اور چائنیز لنچ ہوم تک ہر جگہ دوستوں کا ایک جمگھٹا رہتا ۔ آصف ہمایوں سے میری پہلی ملاقات لیکچرر سلیکشن بورڈ کے دفتر میں ہوئی تھی۔اس وقت بورڈ کے سربراہ اداکار محمد قوی خاں کے برادرِ بزرگ پروفیسر نبی انجم خان تھے جو سائنس کالج وحدت روڈ میں انگریزی کے استاد تھے۔اطہر ناسک کی وساطت سے لیکچرر سلیکشن بورڈ اور یہاں آنے والے جن احباب سے ملاقات ہوا کرتی ان میں نبی انجم خان کے علاوہ آصف ہمایوں ، ظہیربدر ،عبدالکریم خالداورطاہر انجم شامل تھے۔ انہی دنوں کبیر والا سے ہمارے استاد شاعر بیدل حیدری لاہور تشریف لائے تو ہم نے انہیں ان سب احباب سے ملایا۔ بعد میں جب کبھی بیدل حیدری لاہور آتے آصف ہمایوں کا ضرور پوچھتے ۔ ان کے اعزاز میں ایک بار آصف ہمایوں نے اپنے گھر میںشعری نشست کا اہتمام بھی کیا ۔ان دنوں لاہور کی ادبی محفلیں شباب پر تھیں۔اتوار اور بدھ کے روز ہم پاک ٹی ہائوس میں اکٹھے ہوتے۔ حلقہ اربابِ ذوق ، حلقۂ ادب اور پنجابی ادبی سنگت کے اجلاسوں میں بھی شرکت کرتے۔ان دنوں احمد لطیف کسی فلمی رسالے سے وابستہ تھا۔منصورآفاق سے عمران نقوی کی شادی کے روز ملاقات ہوئی اورپھر وہ بھی لاہورکا ہو رہا۔ منصور آفاق نے ہی میرا تعارف فرحت شاہ سے کرایاتھا۔ پھر درمیان میں منصور آفاق ٹیلی ویژن کی روشنیوں میںگم ہوگیااورفرحت شاہ شام نگر میں ہماراپڑوسی بن گیا۔ ان دنوں میں اور اطہر ناسک ایک ہی گلی میں رہائش پذیر تھے۔ جدو جہد کادور تھا ، موجودہ افراتفری اور ایک دوسرے کو روند کر آگے نکلنے کا رویہ عام نہیں ہوا تھا۔آصف ہمایوں ہم سب دوستوں میں ایک دھیمے اور سنجیدہ مزاج شخص تھے۔ وہ صاحب ِمطالعہ ہی نہیں جنیوئن تخلیق کار بھی تھے۔ مشاعروں میں جانے کا انہیں کوئی شوق نہ تھا؛ البتہ دوستوں کی محفل میں وہ شعر سناتے تھے۔ ان کی نظمیں اور غزلیں سن کر سبھی انہیں شعری مجموعہ لانے کا مشورہ دیتے مگر وہ ہنس کر ٹال دیتے۔درمیان میں کچھ عرصہ وہ ملازمت کی گرد میں کھو گئے۔بہت دنوں بعد اگلے روز جب وہ اپنے پہلے مجموعے سمیت نمودار ہوئے تو کتنی ہی کہانیاں یاد آ گئیں۔ماضی بھلے تلخ ہو، یادوں میں سنہری نقوش چھوڑ جاتا ہے۔آصف سے ملاقات میںماضی کی ادبی محافل کے ہنگامے آنکھوں کے سامنے آگئے۔ '' ہر پہر آسمان ‘‘ کی بدولت کائنات اور مابعد الطبعیاتی فکری مسائل کی قوس قزح آنکھوں میں در آئی ہے۔آصف ہمایوں کی نظم میں زندگی کے شعور اور فکری گہرائی کے نقوش نمایا ںہیں ۔ ممتاز نظم گو شاعر آفتاب اقبال شمیم لکھتے ہیں:

''آصف ہمایوں کی غزل کسی پرانی کشید کی طرح ایک کیف آور اٹھان اور اڑان دیتی ہے، میں سمجھتا ہوں وہ بنیادی طور پر ایک غزل گو شاعر ہے‘‘۔

اسی مجموعے کے فلیپ پر غزل گو جاوید شاہین اپنی رائے کا اظہار یوں کرتے ہیں :

''آصف ہمایوں کی شاعری ایک کشادہ دل اور کھلا ذہن رکھنے والے شخص کی شاعری ہے۔آصف ہمایوں، غزل کی نسبت نظم میں اپنی بات زیادہ سہولت اور روانی سے کہتا ہوا نظر آتا ہے۔نظم میں اس کا طرزِ احساس‘ فکر اور لسانی تجربہ بڑے مربوط انداز میں آگے بڑھتا ہے اور اس صنفِ شعر کو توانائی بخشتا ہے‘‘۔

آپ نے محسوس کیا، آفتاب اقبال شمیم اسے غزل گو جبکہ جاوید شاہین نظم میں زیادہ بہتر شاعر قرار دیتے ہیں، وجہ صاف ظاہر ہے کہ ہر شخص اپنے شعبے میں کسی اورکو خود سے بہترکہنے کا حوصلہ نہیں رکھتا۔

میں سمجھتا ہوں ، آصف ہمایوں غزل اور نظم دونوں میں یکساں مہارت کے ساتھ اپنے باطن کے رنگ بکھیرنے پر قادر ہیں۔ ان کی شاعری دماغ سے زیادہ روح اور دل کو چھوتی نظر آتی ہے۔

لوگ دیگ سے چاول کا ایک دانہ چکھ کر ذائقے کا اندازہ لگا لیتے ہیں۔ شاعری چاول کی دیگ نہیں مگر چند اشعار سے بھی شاعرکی فکر ی توانائی اور فنی پختگی سے آشنائی ہو جاتی ہے۔آپ بھی اندازہ لگائیں ، شاعروں کے جھرمٹ میں وہ ایک ''وکھری ٹائپ‘‘ کا شاعر نظر آئے گا:

وہ مل چکا ہے مجھے یا ابھی ملاہی نہیں

یہ مرحلہ تو مری جستجو کا تھا ہی نہیں

دیکھا جو نہیں تھا تمہیں دیکھا ہی نہیں تھا

اب دیکھ رہے ہیں تو فقط دیکھ رہے ہیں

مثالِ مہر خود اپنی دلیل بھی نہ ہوئے

ہم اپنی ایک سحر کے کفیل بھی نہ ہوئے

نہ جانے کون سی منزل ہے یہ سرِ منزل

وجود پہنے سفر کا لباس ہے اب بھی

حدوں کے پار سے آئے حدود میں آئے

پلٹ پلٹ کے ہم اپنی قیود میں آئے

میں ارتقائے مسلسل کی ایک منزل ہوں

تہہِ زمین ذرا سوچ کر اتار مجھے