وزیرداخلہ کا ایف 8، سیرینا انٹرچینجز کا دورہ، پیشرفت کا جائزہ
اسلام آباد (این این آئی) وفاقی وزیرداخلہ محسن نقوی نے ایف ایٹ ایکسچینج چوک انٹرچینج اور سرینا چوک انٹرچینج پراجیکٹس کا اچانک دورہ کیا اور تعمیراتی کاموں کی پیشرفت کا جائزہ لیا۔۔۔
وزیر داخلہ نے ایف ایٹ ایکسچینج چوک انٹرچینج کے انڈر پاس کے معائنہ کے دوران اطراف میں ہارٹیکلچر کیلئے احکامات دیتے ہوئے پراجیکٹس کے تکمیل کی ڈیڈ لائن یقینی بنانے کی ہدایت کی۔ وزیر داخلہ نے کہا ملکی تاریخ میں پہلی بار انڈر پاس 42روز کی مدت میں مکمل کیا گیا ہے۔ محسن نقوی نے کہا دونوں منصوبوں پر 3شفٹوں میں کام جاری رکھا جائے۔ انہوں نے رات کی شفٹ میں اضافی ورک فورس لگانے کی ہدایت کی۔ محسن نقوی نے مزید کہا سرینا ہوٹل میں داخلے کیلئے بھی پلان ترتیب دیا جائے تاکہ مہمانوں اور مسافروں کو غیر ضروری زحمت سے بچایا جاسکے۔ وزیر داخلہ نے ہدایت کی کہ سرینا چوک انٹرچینج کی حدود میں عالی شان قومی پرچم نصب کیا جائے۔ انہوں نے کہا فروری میں ایف ایٹ ایکسچینج چوک انٹرچینج کا مکمل افتتاح کیا جائے گا۔ ڈپٹی کمشنر اسلام آباد اور کنٹریکٹرز نے وزیر داخلہ کو بریفنگ دی۔
