علیم خان کا لیاری ایکسپریس وے کام پر عدم اطمینان،ممبر ساؤتھ معطل
ایم-6 اور ایم 10 موٹرویز پر ترقیاتی کام رواں مالی سال شروع ہو جائیگا، وزیر مواصلات
اسلام آباد (نیوز رپورٹر )وفاقی وزیر برائے مواصلات عبدالعلیم خان نے کراچی کے موجودہ انفراسٹرکچر کی صورتحال پر دکھ اور تشویش کا اظہار کرتے ہوئے کہا کہ موجودہ حالت ہمارے ملک کے معاشی مرکز کے شایانِ شان نہیں۔وفاقی وزیر نے اپنے دورہ کراچی کے دوران لیاری ایکسپریس وے پر جاری کام کو غیر تسلی بخش پایا جس پر انہوں نے ممبر ساؤتھ کو فوری طور پر معطل کرنے کے احکامات جاری کیے ۔ علیم خان نے کہا کہ یہ میرا کراچی کے عوام سے وعدہ ہے کہ لیاری ایکسپریس وے کو ایک مثالی انفراسٹرکچر میں تبدیل کیا جائے گا۔ عبدالعلیم خان نے کہا کہ انہیں یہ اعلان کرتے ہوئے خوشی محسوس ہو رہی ہے کہ ایم-6 موٹروے (سکھر تا حیدرآباد) اور ایم-10 موٹروے (حیدرآباد تا کراچی پورٹ) پر ترقیاتی کام اسی مالی سال کے دوران شروع کیا جائے گا۔ یہ دونوں منصوبے وفاقی حکومت کی جانب سے سندھ کے عوام کے لیے ایک تحفہ ہیں۔
