روس تمام شعبوں میں تعاون بڑھانے کا خواہشمند
کراچی(آئی این پی)پاکستان میں تعینات روسی سفیر ڈینیلا گینچ نے کہا ہے کہ پاکستان کے ساتھ تمام شعبوں میں تعاون بڑھانا چاہتے ہیں، تاہم تجارت کیلئے پاکستان نے اب تک متبادل ادائیگی نظام بنانے میں دلچسپی نہیں لی۔
ان خیالات کا اظہارانہوں نے کراچی میں پاکستان کونسل آف فارن ریلیشن کے تحت کونسل کے سیکریٹری جنرل احسن مختار زبیری کی رہائش گاہ پر منعقدہ تقریب سے خطاب کرتے ہوئے کیا۔ ڈینیلا گینچ نے کہا کہ مغربی پابندیوں کے باوجود روس دنیا کی پانچویں بڑی معیشت بن گیا ، معاشی لحاظ سے ہم جرمنی سے آگے نکل گئے ہیں، پاکستان سے دیرینہ تعلقات ہیں، اپنے سرمایہ کاروں کو سرمایہ کاری کیلئے بھی راغب کریں گے ، پاکستانی تاجروں اور صنعت کاروں کو بھی مشترکہ منصوبوں کیلئے کام کرنا چا ہیے ،روس پر مغربی پابندیوں کے بعد دونوں ملکوں میں تجارت بڑھانے کیلئے ادائیگیوں کا متبادل نظام ضروری ہے ۔ سفیر کا کہنا تھا کہ روس غزہ میں جنگ بندی چاہتا ہے اس کیلئے ہم کوشش کررہے ہیں، جنگ بندی کیلئے روسی قرارداد کو امریکہ اور اس کے اتحادیوں نے ویٹو کیا، غزہ میں انسانی امداد پہنچانے کی ضرورت ہے ،اسرائیل شہریوں پر حملے بند کرے ۔ انہوں نے یوکرائن جنگ کے حوالے سے کہا کہ روس نے فوجی آپریشن اس وقت شروع کیا تھا، جب امریکہ اور اس کے مغربی اتحادیوں نے ہمارے پاس کوئی راستہ نہیں چھوڑا تھا، امریکہ نے تمام وعدے توڑتے ہوئے نیٹو کو مشرقی یورپ میں توسیع دی اور اب ہماری سرحدوں تک آرہے تھے ۔
