ٹریلرڈرائیورکی غفلت سے کمسن بچہ اوروالد جاں بحق
کراچی(اسٹاف رپورٹر)کورنگی قیوم آبادجام صادق پل پر کھڑے ٹریلر سے موٹر سائیکل ٹکرانے سے باپ اور 3 سالہ بچہ جاں بحق ہوگئے ۔۔
جبکہ خاتون محفوظ رہیں۔پولیس کے مطابق موٹر سائیکل پر میاں بیوی اور ان کا 3 سالہ بچہ کورنگی اﷲوالا ٹاؤن سے پنجاب چورنگی کے قریب دہلی کالونی میں واقعے اپنے گھر واپس آرہے تھے ۔زخمیوں کو جناح اسپتال منتقل کیا گیا جہاں پر باپ اور بچہ دوران علاج دم توڑ گئے جن کی شناخت رضوان 49 سالہ اور روحان 3 سالہ روہان کے نام سے ہوئی ہے ۔پولیس حکام کے مطابق ٹریلر خراب ہوگیا تھا تو اس کا ڈرائیور روڈ پر ہی بند کرکے چلا گیا تھا، اندھیرا ہونے کی وجہ سے ٹریلر متوفی رضوان کو موٹر سائیکل چلاتے ہوئے نظر نہیں آیا اور وہ اس سے ٹکرا گیا۔ واقعہ کامقدمہ متوفی رضوان احمد کے بڑے بھائی ندیم احمد کی مدعیت میں کورنگی صنعتی ایریا تھانے میں درج کرلیا گیا ۔مقدمہ غفلت و لاپروائی کی دفعات کے تحت درج کیا گیا ۔ پولیس کے مطابق متوفی رضوان احمد اپنے 3 سالہ بیٹے روہان اوراہلیہ کے ہمراہ اللہ والا ٹاؤن میں سالی کے گھر سے اپنے گھر دہلی کالونی جا رہا تھا کہ جام صادق پل پر کھڑے ٹرالر سے ٹکرا گیا جس سے رضوان اور اس کا بیٹا موقع پر جاں بحق ہوگئے ۔ متوفی 3 سالہ کمسن روہان اپنے والدین کا اکلوتا بیٹھا تھا متوفی رضوان احمد سکیورٹی گارڈ کی ملازمت کرتا تھا،پولیس نے نامعلوم ٹریلر کے ڈرائیور کی تلاش شروع کردی۔
