لائن ٹوٹنے سے جمع پانی کے جوہڑ میں 4 سالہ بچی ڈوب کر جاں بحق
کراچی(آئی این پی)جمالی گوٹھ میں ایک افسوس ناک واقعہ پیش آیا ہے ، پانی کی لائن ٹوٹنے سے جمع پانی کے جوہڑ میں ایک 4 سالہ بچی ڈوب کر جاں بحق ہو گئی۔
تفصیلات کے مطابق سپر ہائی وے جمالی گوٹھ سے 4 سالہ بچی کی ڈوبی ہوئی لاش مل گئی ہے ، ننھی یاسمین جمعہ کی دوپہر سے لاپتا تھی، بچی جمالی گوٹھ گلی نمبر 9 کی رہائشی تھی۔علاقے کے مکین اپنی مدد آپ کے تحت بچی کو تلاش کرتے رہے ، لیکن وہ نہیں مل سکی تھی، آج فراہمی آب کے لیے جمع پانی کے جوہڑ سے بچی کی لاش ملی ہے ۔والدین نے پولیس کے رویے سے اظہار مایوسی کرتے ہوئے کہا ہے کہ وہ قانونی کارروائی نہیں چاہتے ، پولیس کے رویے سے پہلے ہی مایوس ہیں۔ٹاؤن چیئرمین لالہ رحیم نے کہا ہے کہ جس جگہ سے بچی کی لاش ملی وہ ایک پرائیوٹ سوسائٹی ہے ، جہاں پانی کی لائن ٹوٹ جانے کے باعث جوہڑ بن گیا تھا، اگر کسی کی بھی غفلت سامنے آئی تو اس کے خلاف کارروائی کریں گے ۔دوسری طرف بچی کی لاش ملنے کے معاملے پر سائٹ سپر ہائی وے اور سہراب گوٹھ پولیس نے اظہار لاعلمی کیا ہے ، تاحال پولیس ضابطے کی ابتدائی کارروائی کے لیے بھی ورثا کے پاس نہیں پہنچ پائی۔
