اجرک والی نمبر پلیٹ کافیصلہ واپس نہیں ہوگا،وزیرایکسائز
کراچی (مانیٹرنگ ڈیسک)سندھ کے وزیر ایکسائز مکیش چاؤلہ نے کہا ہے کہ حکومت گاڑیوں پر اجرک والی نمبر پلیٹ لگانے کا فیصلہ کسی صورت واپس نہیں لے گی۔
صوبائی وزیرنے نجی ٹی وی کو انٹرویو دیتے ہوئے واضح کیا کہ فیوچرز نمبر پلیٹ (اجراک والی نمبر پلیٹ) تمام موٹر سائیکل اور گاڑی رکھنے والوں کو لگانا ہوں گی۔ سندھ حکومت یہ فیصلہ کسی صورت واپس نہیں لے گی۔مکیش چاؤلہ کا کہنا تھا کہ اجرک ہماری سندھ کی ثقافت ہے ، کسی کو کیوں تکلیف ہو رہی ہے ۔ نمبر پلیٹ میں مزار قائد اور سندھ حکومت کا لوگو بھی موجود ہے ۔ان کا کہنا تھا کہ فیوچرز نمبر پلیٹ 2021 سے جاری کر رہے ہیں، لیکن کچھ لسانی لوگوں نے اجرک نمبر کا معاملہ اٹھایا اور فیوچرز نمبر پلیٹ کو اجرک کا رنگ دے کر لسانیت پھیلائی گئی۔واضح رہے کہ سندھ حکومت نے 2022 میں صوبے میں گاڑیوں کی جعلی نمبر پلیٹ کی روک تھام اور گاڑی کی ملکیت ڈیجیٹل طریقے سے چانچنے کے لیے صوبے میں جدید سکیورٹی فیچرز کے ساتھ گاڑیوں کی نمبر پلیٹس کے اجرا شروع کیا تھا۔محکمہ ایکسائز سندھ کے مطابق نئی نمبر پلیٹس سے گاڑیوں کی ٹریکنگ اور ڈیٹا حاصل کرنا نہایت آسان ہوگا جب کہ یہ نمبر پلیٹس کیمرا ریڈ ایبل ہوں گی۔محکمہ ایکسائز کا یہ بھی کہنا تھا کہ ان نئی نمبر پلیٹس میں 5 سیکیورٹی فیچرز موجود ہوں گے جن میں ٹریکنگ چپ، لیزر سیریل نمبر، سندھ حکومت کا مونوگرام، لیزر انٹیگریٹڈ مارک شامل ہیں
