ملزمان پٹرول پمپ کے کیشئیر سے 33لاکھ روپے لوٹ کر فرار
موٹرسائیکل پر سوار ہو کر رقم جمع کرانے جا رہا تھا، دو موٹرسائیکلوں پر سوار 3 اشخاص نے اسلحہ مجھ پر تان دیا ،کیشیئرمحمدعارف عوامی کالونی پولیس نے واقعے کا مقدمہ درج کر لیا، فارنزک کی ٹیم کو طلب کر کے موقع سے شواہد اکٹھے کر لیے ،تفتیش شروع
کراچی(مانیٹرنگ ڈیسک)کورنگی سنگر چورنگی کے قریب موٹرسائیکل سوار ملزمان پٹرول پمپ کے کیشیئر سے 33 لاکھ روپے کے رقم لوٹ کر فرار ہوگئے ، عوامی کالونی پولیس نے واقعے کا مقدمہ کیشیئر کی مدعیت میں درج کر کے تفتیش کا آغاز کر دیا۔رپورٹ کے مطابق عوامی کالونی تھانے کی حدود سنگر چورنگی سیکٹر 27 کورنگی انڈسٹریل ایریا بالمقابل پی ایس او پٹرول پمپ کے قریب ڈکیتی کی واردات ، واردات میں دو موٹرسائیکلوں پر سوار 3 ڈاکو پٹرول پمپ کے کیشیئر سے 33 لاکھ روپے چھین کر فرار ہوگئے ۔واقعے کی اطلاع مدد گار 15 پولیس کو دی گئی ، عوامی کالونی تھانے کی پولیس نے موقع پر پہنچ فارنزک کی ٹیم کو طلب کر کے موقع سے شواہد اکٹھے کر لیے ۔
پٹرول پمپ کے کیشیئرمحمد عارف ولد محمد شریف نے پولیس کو اپنے بیان میں بتایا کہ وہ لانڈھی کا رہائشی وار وینس سروس اسٹیشن پی ایس او پٹرول پمپ سنگر چورنگی کورنگی انڈسٹریل ایریا پر بطور اکاؤنٹنٹ ملازمت کرتا ہے ۔27 جنوری 2026 کو وہ پٹرول پمپ کے کیش 33 لاکھ روپے ہمراہ امام بخش ولد محمد اسماعیل کے موٹرسائیکل پر سوار ہو کر سنگر چورنگی سیکٹر 27 کورنگی انڈسٹریل ایریا بالمقابل پی ایس او پٹرول پمپ پر جمع کروانے کے لیے جا رہا تھا کہ دن تقریباً 11 بجکر 5 منٹ پر جیسے ہی پٹرول پمپ سے نکلا تو اچانک دو موٹرسائیکلوں پر سوار 3 اشخاص نے آکر مجھے روکا اور اسلحہ مجھ پر تان دیا اور پلاسٹک شاپر میں موجود پٹرول پمپ کے رقم 33 لاکھ روپے چھین لیے ۔ملزمان بول چال اور شکل صورت سے غیر مقامی معلوم ہو رہے تھے اور جواں عمر تھے جن کو میں سامنے آنے پر پہچان بھی سکتا ہوں، ملزم رقم لے کر فرار ہوگئے تھے ۔واردات کی اطلاع مددگار 15 ہیلپ لائن پر بھی دی تھی۔
مدعی کیشیئرمحمد عارف نے اپنے بیان میں بتایا کہ پٹرول پمپ کے مالکان کے کہنے پر وہ رپورٹ درج کرانے عوامی کالونی تھانے آیا ہے ۔پولیس نے مدعی کے بیان کی روشنی میں 27 جنوری 2026 کو دن تقریباً ایک بجکر 15 منٹ پر واقعے کا مقدمہ الزام نمبر 54/26 بجرم دفعہ 397/34 کے تحت درج کر لیا ، مقدمے کے تفتیش انچارج سی آئی سی کورنگی ڈویژن کراچی کے حوالے کر دی گئی۔
