پلاٹوں ، میدانوں میں کوڑا کرکٹ، آلودگی میں اضافہ
خانیوال(ڈسٹرکٹ رپورٹر ،نامہ نگار )خالی پلاٹوں اور کھیل کے میدانوں میں پڑا کوڑا کرکٹ ماحولیاتی آلودگی میں اضافے کا باعث بننے لگا۔۔۔
وقت پر کوڑا نہ اٹھائے جانے کیوجہ سے کھیل کے میدان بچوں میں بیماریاں بانٹنے لگے ،فلتھ ڈپو ؤں اور پلاٹوں وغیرہ میں پڑے کوڑے کو آگ لگا نا سینٹری ورکروں نے معمول بنا لیا خانیوال شہر و ملحقہ آبادیوں سمیت پوش اور گنجان آباد علاقوں میں درجنوں خالی پلاٹوں اور کھیل کے میدانوں میں پڑے کوڑے کرکٹ کے ڈھیر شہریوں کے لئے عذاب بن گئے اوربعض مقامات پر بنائے گئے فلتھ ڈپو ؤں کو کئی کئی روز تک کوڑے سے خالی نہیں کئے جاتے جس کی وجہ سے علاقوں میں تعفن پھیل جاتا ہے ، شہریوں کے مطابق ریڑھیوں،موٹر سائیکل رکشوں کے ذریعے کوڑا کرکٹ گنجان آبادیوں اور محلوں وغیرہ کے خالی پلاٹوں میں پھینکنا سینٹری ورکروں کا مشغلہ بن چکا ہے ، سینٹری ورکرز کوڑا کرکٹ ٹھکانے لگانے کی بجائے خالی پلاٹوں، بازاروں، گلی محلوں میں کوڑے کے ڈھیروں کو آگ لگانے کو ترجیح دیتے ہیں جس سے فضا آلودہ اور سانس لینا مشکل ہو جاتا ہے۔
