شہر کے مرکزی علاقوں کو ماڈل بنانے کا فیصلہ
سرگودھا(سٹاف رپورٹر)وزیر اعلیٰ پنجاب مریم نواز شریف کے فلیگ شپ پراجیکٹ پر عملدرآمد کے سلسلے میں کمشنر سرگودھا ڈویژن جہانزیب اعوان کی زیر صدارت ایک اہم اجلاس ان کے کانفرنس روم میں منعقد ہوا۔
اجلاس میں ڈپٹی کمشنر سرگودہا کیپٹن (ر) محمد وسیم، ایس ای فیسکو ابرار احمد، ڈائریکٹر ڈویلپمنٹ بلال حسن، ایس ای ہائی ویز رانا عابد، سی او ایم سی حامد چھٹہ، پی ٹی سی ایل اور سوئی گیس کے افسران نے شرکت کی۔اجلاس میں بتایا گیا کہ وزیر اعلیٰ پنجاب کی ہدایات پر سرگودہا شہر کے مرکزی علاقے ، خصوصاً گول چوک، سٹی روڈ اور کچہری روڈ کو ماڈل بنانے کا فیصلہ کیا گیا ہے ۔ اس منصوبے کے تحت مذکورہ علاقوں میں سڑکوں کی تعمیر و مرمت، دکانوں کے سامنے یکساں فساڈ، بیوٹیفکیشن، بجلی، ٹیلی فون اور دیگر یوٹیلٹی سروسز کی تاروں کو انڈر گراؤنڈ کرنا اور دیگر تعمیراتی کام شامل ہیں۔کمشنر نے اجلاس سے خطاب کرتے ہوئے کہا کہ یہ منصوبہ وفاقی، صوبائی اور لوکل گورنمنٹ کے اداروں کے باہمی اشتراک سے مکمل کیا جائے گا۔ انہوں نے فیسکو، پی ٹی سی ایل اور سوئی گیس حکام کو ہدایت کی کہ وہ انڈر گراؤنڈ انفراسٹرکچر کے لیے جامع منصوبہ بندی اور لاگت کا تخمینہ فوری طور پر تیار کریں تاکہ منصوبے پر بروقت عملدرآمد ممکن ہو سکے ۔ اجلاس کے دوران منصوبے کی تکمیل کے بعد کی تھری ڈی ویڈیو بھی پیش کی گئی جس میں مجوزہ علاقے کی خوبصورتی اور سہولیات کی جھلک دکھائی گئی۔ اجلاس میں منصوبے کے ٹی او آرز طے کیے گئے اور ایک مربوط کمیٹی کے قیام پر بھی اتفاق کیا گیا۔ کمشنر جہانزیب اعوان نے کہا کہ اس منصوبے کا بنیادی مقصد شہر کے مرکزی علاقے کو رول ماڈل کے طور پر ڈویلپ کرنا ہے تاکہ مستقبل میں دیگر شہری علاقوں کو بھی اسی طرز پر ماڈل اور خوبصورت بنایا جا سکے ۔ انہوں نے متعلقہ افسران کو ہدایت کی کہ وہ اپنے اپنے دائرہ کار میں کام کی بروقت اور معیاری تکمیل کو یقینی بنائیں۔
