ٹی 20 ورلڈکپ سے قبل کونسی ٹیم کتنے میچز کھیلے گی؟ شیڈول جاری
لاہور: (دنیا نیوز) آئی سی سی ٹی 20 ورلڈکپ 2026 سے قبل فل ممبر ٹیموں کی تیاریاں حتمی مرحلے میں داخل ہوگئیں۔
ٹی 20 ورلڈکپ 7 فروری سے 8 مارچ تک بھارت اور سری لنکا میں کھیلا جائے گا تاہم ٹی 20 ورلڈکپ سے قبل اب کسی فل ممبر کی مزید کسی سیریز کا امکان ختم ہو گیا ہے۔
پاکستان ٹیم ٹی 20 ورلڈکپ سے قبل 6 میچز کھیلے گی، جنوری میں پاکستان ٹیم کے 3میچز سری لنکا میں اور 3 ہوم گراؤنڈ پر آسٹریلیا کے ساتھ ہوں گے۔
دوسری جانب افغانستان، بنگلا دیش، آئر لینڈ اور زمبابوے ٹی 20 ورلڈکپ سے قبل کوئی میچ نہیں کھیلیں گے، آسٹریلیا نے پاکستان کے خلاف 3 ٹی 20 میچز کھیلنا ہیں اور انگلینڈ نے سری لنکا میں 3 ٹی 20 میچز جنوری میں کھیلنا ہیں۔
بھارت کی ٹیم ہوم گراؤنڈ پر 5 ٹی 20 میچز کی سیریز کھیل رہی ہے، بھارت کی ٹیم جنوری میں بھی نیوزی لینڈ کے ساتھ 5 ٹی 20 میچز کی ہوم سیریز کھیلے گی جبکہ جنوبی افریقہ بھارت میں سیریز کھیل رہی ہے، 3 ٹی 20 میچز کے لیے ویسٹ انڈیز ٹیم جنوبی افریقہ کا دورہ کرے گی۔
دسمبر جنوری میں بھارتی ٹیم سب سے زیادہ 10 ٹی 20 میچز کھیلے گی، جنوبی افریقہ کی ٹیم کو 8 ٹی 20 میچز کھیلنے کا موقع مل رہا ہے جبکہ پاکستان کرکٹ ٹیم ٹی 20 ورلڈکپ سے قبل 6 ٹی 20 میچز کھیلے گی۔
میزبان سری لنکن کرکٹ ٹیم بھی ہوم گراونڈ پر 6 میچز کھیلے گی اور نیوزی لینڈ کرکٹ ٹیم 5 ٹی 20 میچز کھیلے گی، آسٹریلیا، انگلینڈ اور ویسٹ انڈیز کو 3، 3 ٹی 20 میچز مل رہے ہیں۔
