کراچی میں مبینہ پولیس مقابلہ، ایک ڈکیت ہلاک، زخمی ساتھی گرفتار
کراچی: (دنیا نیوز) سہراب گوٹھ کے علاقے انڈس پلازہ کے قریب مبینہ پولیس مقابلے میں ایک ڈکیت ہلاک جبکہ اس کا ساتھی زخمی اور تیسرا ملزم فرارہوگیا۔
پولیس کے مطابق اے ایس آئی جمیل ودیگر اہلکارگشت پر تھے کہ ان کا ٹکراؤ تین ڈاکوؤں سے ہوا، پولیس نے ملزموں کو روکنا چاہا تو ملزموں نے پولیس پر فائرنگ کردی، جوابی فائرنگ میں ایک ڈکیت ہلاک ہوا، جس کی شناخت عجب گل ولد کرم خان جبکہ زخمی ملزم کی شناخت خیال محمد ولد حضرت خان کے نام سے ہوئی ہے۔
پولیس کے مطابق فرار ملزم کا نام حضرت گل ولد سعید خان معلوم ہوا ہے جس کی تلاش جاری ہے، پولیس نے ہلاک وزخمی ملزموں کے قبضے سے غیر قانونی نائن ایم ایم اور تیس بور پستول برآمد کی ہے اس حوالے سے مزید تحقیقات کی جارہی ہے۔
