پاکستان نے کینیڈا کو ہرا کر ٹی 20 ورلڈ کپ میں پہلی فتح کا مزہ چکھ لیا
نیویارک: (دنیا نیوز) آئی سی سی ٹی 20 ورلڈ کپ 2024 کے 22ویں میچ میں پاکستان نے کینیڈا کو 7 وکٹوں سے شکست دیکر ایونٹ میں پہلی فتح حاصل کرلی۔
نیویارک کے نساؤ کاؤنٹی انٹرنیشنل کرکٹ سٹیڈیم میں کھیلے جانیوالے آئی سی سی ٹی 20 ورلڈ کپ کے 22 ویں میچ میں پاکستان کرکٹ ٹیم کے کپتان بابراعظم نے ٹاس جیت کر کینیڈا کو پہلے بیٹنگ کی دعوت دی تاہم پہلے بیٹنگ کرتے ہوئے کینیڈا نے مقررہ 20 اوورز میں 7 وکٹوں کے نقصان پر 106 رنز بنائے، ایرون جانسن 52 رنز کیساتھ نمایاں رہے۔
پاکستان نے 107 رنز کا ہدف 18 ویں اوور میں 3 وکٹوں کے نقصان پر بآسانی حاصل کرلیا، محمد رضوان 53 رنز کیساتھ ناقابل شکست رہے۔
کینیڈا کی باری
کینیڈا کی جانب سے اننگز کا آغاز ایرون جانسن اور نونیت دھلیوال نے کیا تاہم یہ جوڑی زیادہ دیر تک ساتھ نہ نبھا سکی اور 20 کے مجموعی سکور پر نونیت دھلیوال 4 رنز بنا کر محمد عامر کی گیند پر بولڈ ہوگئے۔
کینیڈا کی دوسری وکٹ 29 رنز کے مجموعی سکور پر گری جب پراگت سنگھ 2 رنز بنا کر شاہین شاہ آفریدی کی گیند پر کیچ تھما بیٹھے، تیسری وکٹ نکلس کرٹن کی گری جو ایک سکور بنا کر رن آؤٹ ہوگئے۔
چوتھی وکٹ 54 رنز کے مجموعی سکور پر گری جب شریاس مووا 2 رنز بناکر حارث رؤف کی گیند پر کیچ آؤٹ ہوئے، پانچویں وکٹ رووندرپال سنگھ کی گری جو بغیر کوئی رن سکور کئے پویلین لوٹ گئے۔
کینیڈا کی چھٹی وکٹ اوپنر بلے باز ایرون جانسن کی گری جو 52 رنز کی نمایاں اننگز کھیل کر نسیم شاہ کی گیند پر بولڈ ہوئے، ساتویں وکٹ 87 کے مجموعی سکور پر گری جب کپتان سعد بن ظفر 10 رنز بناکر محمد عامر کی گیند پر کیچ تھما بیٹھے۔
پاکستان کی جانب سے محمد عامر اور حارث رؤف نے 2،2 جبکہ شاہین شاہ آفریدی اور نسیم شاہ نے ایک ایک وکٹ حاصل کی۔
پاکستان کی اننگز
107 رنز کے ہدف کے تعاقب میں پاکستان کی جانب سے اننگز کا آغاز محمد رضوان اور صائم ایوب نے کیا تاہم یہ جوڑی لمبی اننگز کھیلنے میں ناکام رہی اور صائم ایوب 20 رنز کے مجموعی سکور پر 6 رنز بنا کر ڈِلن ہیلیگر کی گیند پر کیچ آؤٹ ہوگئے۔
پاکستان کی دوسری وکٹ 83 رنز کے مجموعی سکور پر گری جب کپتان بابر اعظم 33 گیندوں پر 33 رنز بناکر ڈِلن ہیلیگر کی گیند پر کیچ تھما بیٹھے جبکہ چوتھی وکٹ 104 رنز کے مجموعی سکور پر گری جب فخر زمان 4 رنز بناکر کیچ آؤٹ ہوگئے، محمد رضوان 53 رنز کیساتھ ناقابل شکست رہے۔
کینیڈا کی جانب سے ڈِلن ہیلیگر نے 2 جبکہ جیرمی گورڈن نے ایک وکٹ حاصل کی۔
