اسرائیل کی غزہ میں وحشیانہ بمباری جاری، مزید 37 فلسطینی شہید، 120 زخمی
غزہ: (دنیا نیوز) دہشت گرد اسرائیل کی غزہ بھر میں وحشیانہ بمباری نہ تھم سکی ، 24 گھنٹے میں صیہونی حملوں میں مزید 37 فلسطینی شہید، 120 زخمی ہو گئے۔
عرب میڈیا کے مطابق اسرائیلی فوج نے شمالی غزہ کا مسلسل محاصرہ کر رکھا ہے، ہزاروں فلسطینی نقل مکانی کر چکے ہیں۔
غزہ کے جنوبی علاقے رفاہ میں اسرائیلی فضائی حملوں میں 5 افراد شہید ہو گئے، اسرائیلی فورسز نے شمال میں جبالیہ کیمپ میں رہائشی عمارتوں کو تباہ کر نا شروع کر دیا، غزہ شہر کے علاقے شجاعیہ پر اسرائیلی حملے میں 3 فلسطینی شہید ہوگئے۔
عرب میڈیا کے مطابق بیت لاہیہ میں فلسطینی گروپ پر اسرائیلی فضائیہ کے حملہ میں 3 افراد شہید ہو گئے، دوسری جانب خان یونس کی انتظامیہ کے پاس پانی اور سیوریج کی سہولیات چلانے کیلئے ایندھن ختم ہو گیا۔
اسرائیلی فوجیوں نے مقبوضہ مغربی کنارے میں 12 فلسطینیوں کو گرفتار کر لیا، اسرائیلی نسل کشی میں مجموعی طور پر 43 ہزار 799 فلسطینی شہید، 1 لاکھ 3 ہزار 601 زخمی ہو چکے ہیں۔
