چیف جسٹس عالیہ نیلم کے انقلابی اقدامات، 2025 پنجاب کی عدلیہ کا بہترین سال
لاہور (محمد اشفاق) چیف جسٹس لاہور ہائی کورٹ جسٹس عالیہ نیلم کے انقلابی اقدامات کی بدولت سال 2025 پنجاب کی عدلیہ کا بہترین سال قرار دے دیا گیا ہے۔
انٹی گریٹڈ کریمنل جسٹس سسٹم کا نفاذ، ججز کی میرٹ پر بھرتی، انفراسٹرکچر کی فراہمی، جدید ٹیکنالوجی کا استعمال ، وڈیو لنکس کی سہولت سمیت وکلا کی فلاح وبہبود اور خواتین وکلا کے لیے الگ جوڈیشل کمپلیکس کی تعمیر سے ادارہ پر سائلین کے اعتماد میں اضافہ ہوا۔
چیف جسٹس لاہور ہائیکورٹ عالیہ نیلم شہریوں کو بروقت انصاف کی فراہمی یقینی بنانے کے ساتھ انتظامی سطح اور وکلا کی فلاح کے تاریخی منصوبے پایہ تکمیل تک پہنچانے کے لیے پر عزم ہیں، سال 2025 میں اس حوالے سے تاریخی اقدامات اٹھائے گئے۔
چیف جسٹس عالیہ نیلم کے حکم پر کیس مینجمنٹ سسٹم میں جدید ٹیکنالوجی سے تبدیلیاں لائی گئیں جس سے مقدمات کو بروقت نمٹانے میں مدد ملی، صوبائی جسٹس کمیٹی کے تحت انٹیگریٹڈ کریمینل جسٹس سسٹم کا آغاز کیا گیا جس کے تحت ایف آئی آر سے لے کر مقدمہ کے فیصلے تک مکمل ریکارڈ کا انٹیگریٹڈ کریمنل جسٹس سسٹم فعال کر دیا گیا۔
2025ء میں نئے نظام کے تحت ڈیجیٹل فائل ٹریکنگ سسٹم، کمپیوٹرائزڈ موومنٹ انڈیکس اور کاپی پٹیشن ٹریکنگ سسٹم متعارف کرایا گیا ہے، کاپی برانچ کی کارکردگی بہتر بنا کر وکلاء اور سائلین کو بروقت مصد اسقہ نقول کی فراہمی یقینی بنائی جارہی ہے۔
خواتین وکلا کے لیے الگ لیڈی بار رومز اور جوڈیشل کمپلیکس تعمیر کیے گئے، وکلا کی سہولیات کے لیے مزید نئی عمارتوں کی تعمیر کے منصوبوں کو مکمل کرکے لاہور میں جوڈیشل ٹاور کی تعمیر کا فیصلہ کیا گیا جب کہ سائلین کی شکایات کے ازالہ کے لیے پنجاب کی ماتحت عدالتوں میں شکایات بکس نصب کیے گئے۔
چیف جسٹس لاہور ہائیکورٹ مس عالیہ نیلم کی پالیسیوں کے نفاذ سے سال 2025 میں گزشتہ برسوں سے ریکارڈ زیادہ کیس نمٹائے گئے، اعداد و شمار کے مطابق سال 2025 کا جب آغاز ہوا تو زہر التوا مقدمات کی تعداد 198005 تھی جبکہ 1 لاکھ 34 ہزار 490 نئے کیس دائر ہوئے، لاہور ہائیکورٹ کی پرنسپل سیٹ سمیت چاروں بنچوں میں ججوں نے ایک لاکھ 66 ہزار 643 مقدمات کے فیصلے سنائے۔
لاہور ہائیکورٹ میں اس وقت ایک لاکھ 69 ہزار 37 مقدمات زیر التوا ہیں، یعنی سال 2025 میں زیر التوا مقدمات میں 40 ہزار مقدمات کی ریکارڈ کمی آئی ہے۔
سینئر قانون دان احسن بھون کا کہنا ہے کہ سال 2025 پنجاب عدلیہ کا بہترین سال ہے، چیف جسٹس عالیہ نیلم کے وژن سے زیر التوا مقدمات میں کمی آئی ہے اور یہ خوش آئند بات ہے، چیف جسٹس عالیہ نیلم نے بہترین اقدامات کئے ہیں۔
سیکرٹری لاہور ہائیکورٹ بار فرخ الیاس چیمہ کا کہنا ہے کہ چیف جسٹس عالیہ نیلم نے حقیقی معنوں میں سائلین کو بروقت انصاف کی فراہمی یقینی بنائی اور وکلا کا بھی یہی مطالبہ تھا۔
ماہر قانون نصیر کمبوہ کا کہنا تھا کہ چیف جسٹس عالیہ نیلم نے وکلا کی سہولیات کے لیے عملی اقدامات اٹھائے جس کے ہم مشکور ہیں چیف جسٹس کو خراج تحسین پیش کرتے ہیں۔
