اینٹی نارکوٹکس فورس کی بلوچستان میں ایک اور بڑی کارروائی، منشیات سمگلنگ ناکام
کوئٹہ: (دنیا نیوز) اینٹی نارکوٹکس فورس نے بلوچستان میں ایک اور بڑی کارروائی کرتے ہوئے منشیات سمگلنگ ناکام بنا دی۔
اینٹی نارکوٹکس فورس نے خفیہ اطلاعات پر ضلع کیچ کے علاقے سیٹلائٹ ٹاؤن کے قریب کامیاب کارروائی میں پنجگور سے تربت منشیات کی بڑی سمگلنگ ناکام بنادی۔
اے این ایف کے مطابق برآمد شدہ منشیات میں 99 کلو آئس، 50 کلو افیون اور 73 کلوگرام چرس شامل ہے، ضبط کی گئی منشیات کی مجموعی مالیت تقریباً 3 کروڑ 26 لاکھ روپے ہے۔
اے این ایف ٹیم نے ایک گاڑی کی تلاشی کے دوران پلاسٹک کے کینز میں چھپائی گئی منشیات کی بھاری مقدار پکڑی، کامیاب کارروائی میں ایک ملزم بھی گرفتار کیا، مزید قانونی کارروائی کے لیے پولیس سٹیشن اے این ایف منتقل کر دیا گیا۔
ذرائع کے مطابق منشیات سمگلنگ کے پورے نیٹ ورک کا سراغ لگانے اور اسے بے نقاب کرنے کے لیے کوششیں جاری ہیں، مسلسل نگرانی، بروقت خفیہ معلومات کے حصول اور مؤثر کارروائیوں سے اے این ایف منشیات کی ترسیل کی کوششوں کو ناکام بنا رہے ہیں۔
