کراچی: طلبہ و فیکلٹی ممبران کا ملیر گیریژن دورہ، پاک فوج کے ساتھ یادگار دن
کراچی: (دنیا نیوز) شہرِ قائد کی مختلف جامعات کے طلبہ اور فیکلٹی ممبران نے ملیر گیریژن کا دورہ کیا جہاں انہوں نے پاک فوج کے ساتھ ایک یادگار دن گزارا۔
دورے کے موقع پر طلبہ اور فیکلٹی ممبران کے لیے جی او سی ملیر گیریژن کراچی کے ساتھ خصوصی مکالماتی نشست کا اہتمام کیا گیا، اس نشست میں طلبہ و اساتذہ کو قومی سلامتی، موجودہ چیلنجز اور پاک فوج کے کردار سے آگاہ کیا گیا۔
طلبہ و فیکلٹی ممبران نے جدید اسلحے، فائرنگ کی عملی مشقوں اور فوجی جوانوں کی جنگی مہارتوں کا مشاہدہ کیا، جی او سی ملیر نے خصوصی نشست کے دوران دشمن کے منفی پروپیگنڈے کے مؤثر توڑ کی اہمیت پر تفصیلی روشنی بھی ڈالی۔
جی او سی ملیر نے خطاب کرتے ہوئے ففتھ جنریشن وارفیئر کے خطرات سے آگاہ کیا اور قومی سطح پر فکری و ذہنی تیاری کی ضرورت پر زور دیا، طلبہ نے پاک فوج کی پیشہ ورانہ صلاحیتوں کو سراہتے ہوئے قومی یکجہتی اور یکسوئی کا اظہار کیا۔
ملیر گیریژن میں یادگار روز کے اختتام پر طلبہ و اساتذہ نے پاک فوج کے ساتھ اظہارِ جانثاری اور مکمل یکجہتی کا اعادہ کیا، اس دورے نے نوجوان نسل میں پاک فوج کے کردار، قربانیوں اور قومی سلامتی سے متعلق شعور کو مزید مضبوط کیا۔
