شہر قائد میں اوباش کی کمسن لڑکے سے زیادتی، نیم بیہوشی میں پھینک کر فرار
کراچی: (ویب ڈیسک) شہر قائد میں اوباش نے کمسن لڑکے کو زیادتی کا نشانہ بنا ڈالا اور نیم بیہوشی میں پھینک کر فرار ہوگیا۔
کورنگی صنعتی ایریا پولیس نے بیوہ خاتون رضوانہ کی مدعیت میں نامعلوم ملزم کے خلاف مقدمہ درج کرلیا جس میں مدعیہ نے پولیس کو بیان دیا ہے کہ 20 دسمبر کی شب ایک موبائل فون سے کال آئی اور مجھے بتایا کہ تمہارا بچہ 10 سالہ زوہیب کورنگی ڈرائیونگ لائسنس برانچ کاز وے کے قریب بے ہوشی کی حالت میں ملا ہے جس کے ساتھ زیادتی ہوئی ہے اور اسے جناح ہسپتال روانہ کیا گیا ہے جس پر وہ اپنے دیور عمران کے ہمراہ جناح ہسپتال گئی۔
بیوہ رضوانہ نے مزید بتایا کہ اپنے بیٹے کو بہت بری حالت میں دیکھا تاہم بیٹے نے بتایا کہ وہ کورنگی ناصر جمپ کے قریب کام پر جانے کے لئے بس سٹاپ پر کھڑا تھا کہ موٹر سائیکل سوار نامعلوم شخص نے آکر مجھے لفٹ دی جس پر میں اس کے ہمراہ بیٹھ گیا۔
خاتون نے مزید بتایا کہ میرے بیٹے کا کہنا تھا کہ ملزم مجھے گودام چورنگی لے گیا اور ندی کے قریب جنگل میں لیجا کر اسے زیادتی کا نشانہ بنایا اور جب میری حالت غیر ہوئی تو وہ مجھے موٹر سائیکل پر کورنگی لائسنس برانچ کے قریب پھینک کر فرار ہوگیا۔
پولیس نے مقدمہ درج کر کے مزید تفتیش کے لئے انویسٹی گیشن پولیس کے حوالے کر دیا۔
