صدر ٹرمپ کا امریکی تاریخ کا سب سے بڑا بحری جہاز وکٹری بنانے کا اعلان
واشنگٹن: (دنیا نیوز) صدر ڈونلڈ ٹرمپ نے امریکی تاریخ کا سب سے بڑا بحری جہاز وکٹری بنانے کا اعلان کر دیا۔
امریکی صدر ڈونلڈ ٹرمپ نے وزیر دفاع پیٹ ہیگستھ اور نیول چیف کے ہمراہ میڈیا سے گفتگو میں کہا ہماری فوج دنیا کی بہترین فورس ہے، امریکی بحریہ میں طاقتورترین طیارہ بردار جہاز شامل کر رہے ہیں، شراکت داروں کے ساتھ ملکر امریکی تاریخ کا سب سے بڑا بحری جنگی جہاز امریکا میں بنا رہے ہیں۔
صدر ٹرمپ نے کہا کہ اس جہاز میں گن، ہائپر سونک میزائل، لیزر سب شامل ہیں، امریکا کو نئے بحری جہازوں کی اشد ضرورت تھی، ہماری آبدوزیں بھی دنیا میں سب سے جدید ہیں، پندرہ جدید ترین آبدوزیں اور تین نئے بحری جہاز تیاری کے مراحل میں ہیں۔
انہوں نے مزید کہا کہ آبدوز سازی میں امریکا کسی بھی ملک سے پندرہ سال آگے ہے، چین یا روس بھی آبدوزوں میں ہمارا مقابلہ نہیں کر سکتے، امریکی بحریہ کو دنیا کی طاتور ترین بحریہ بنا رہے ہیں، ہماری سرحدیں محفوظ اور معیشت مضبوط ہے۔
امریکی صدر کا کہنا تھا کہ ایک دو سال پہلے جو ہم پر ہنستے تھے اب ہمارا احترام کرتے ہیں، امریکا کے پاس دنیا کے بہترین ہتھیار اور آلات ہیں، بحریہ ہیڈ کوارٹرز بھی بہتر کیا جا رہا ہے۔
صدر ٹرمپ نے کہا کہ منشیات کی کشتی تباہ کرنے سے ہم ہر بار25ہزارجانیں بچاتے ہیں، منشیات سے بھری کشتیوں کو سمندر میں تباہ کیا جا رہا ہے، کیریبین میں سمندر کے راستے منشیات کی سمگلنگ96.2 فیصد کم ہوگئی۔
انہوں نے کہا کہ امریکا میں گزشتہ سال 3 لاکھ افراد منشیات کے استعمال سے ہلاک ہوئے، بل کلنٹن کی ایبسٹین فائلز میں تصاویر دیکھ کر دکھ ہوا، جیفری ایبسٹین سے پارٹی میں ملنے والوں کی تصاویرسامنے آئی ہیں، کئی افراد کوجیفری ایبسٹین کے بارے میں معلوم نہیں تھا، میں نے جیفری ایبسٹین کے جزیرے کا کبھی دورہ نہیں کیا۔
امریکی صدر کا مزیدکہنا تھا کہ ہم نے جیفری ایبسٹین کو مارالاگوپام بیچ سے نکال دیا تھا، ایبسٹین فائلز میں تصاویر کی بنیاد پر کئی افراد کو تنقید کا سامنا ہے۔
امریکی صدر نے کہا کہ پاکستان اور بھارت کے درمیان ایٹمی جنگ رکوائی، پاکستان کے وزیراعظم اور فیلڈمارشل نے کہا ٹرمپ نے 10 لاکھ جانیں بچائیں، دنیا میں اب تک 8 جنگیں رکوا چکا ہوں۔
