لندن: بنگلہ دیشی سفارتخانے کے باہر سکھوں نے ہندوؤں کا مظاہرہ ناکام بنا دیا
لندن: (دنیا نیوز)لندن میں بنگلہ دیشی سفارتخانے کے سامنے اس وقت شدید کشیدگی پیدا ہو گئی جب بھارتی ہندو مظاہرین اور خالصتان کے حامی سکھ آمنے سامنے آ گئے۔
یہ صورتحال اس قدر بگڑی کہ دونوں گروپوں کے درمیان جھڑپیں شروع ہو گئیں، جس پر برطانوی پولیس کو فوری مداخلت کرنا پڑی۔
بھارتی ہندو مظاہرین بنگلہ دیش میں ایک ہندو شہری کے قتل کے خلاف احتجاج کے لیے سفارتخانے کے سامنے جمع ہوئے تھے
تاہم مظاہرہ اس وقت ناکام ہو گیا جب خالصتانی سکھ بنگلہ دیش کی حمایت میں خالصتان کے پرچم لہراتے ہوئے موقع پر پہنچ گئے۔
عینی شاہدین کے مطابق خالصتانی سکھوں اور بھارتی ہندو مظاہرین کے درمیان شدید نعرے بازی اور ہاتھا پائی ہوئی جس کے بعد برطانوی پولیس نے دونوں گروپوں کو الگ کر کے صورتحال پر قابو پایا۔
پولیس نے بنگلہ دیشی سفارتخانے کے گرد حفاظتی حصار قائم کر دیا تاکہ مزید کسی ناخوشگوار واقعہ سے بچا جا سکے، اس دوران خالصتانی سکھوں نے بھارتی وزیراعظم نریندر مودی کے خلاف شدید نعرے بازی کی۔
مظاہرین کی جانب سے ’’ہادی کو کس نے قتل کیا؟ مودی، مودی، بھارت‘‘ اور ’’شہید نجار کو کس نے قتل کیا مودی، مودی، بھارت‘‘ جیسے نعرے لگائے گئے جس سے فضا مکمل طور پر مودی مخالف رنگ اختیار کر گئی۔
