سڈنی تھنڈر کی شاداب خان کو قومی ٹیم میں شمولیت پر مبارکباد
کینبرا: (ویب ڈیسک) سڈنی تھنڈر نے پاکستان ٹیم میں منتخب ہونے پر آل راونڈر شاداب خان کو مبارکباد دی ہے۔
یاد رہے کہ شاداب خان کو سری لنکا کے خلاف ٹی 20 سیریز کے لیے پاکستان ٹیم میں شامل کیا گیا ہے، اس وقت شاداب خان بگ بیش لیگ میں سڈنی تھنڈر کی نمائندگی کر رہے ہیں۔
ترجمان سڈنی تھنڈر کے مطابق شاداب 4 جنوری کو ہوبارٹ ہیوریکینز کے خلاف میچ کھیلنے کے بعد سری لنکا روانہ ہوں گے۔
انہوں نے کہا کہ شاداب 16 جنوری کو سڈنی کرکٹ گراونڈ میں سڈنی سمیش کیلئے دستیاب ہوں گے، جبکہ سڈنی تھنڈر کے فائنل میں پہنچنے کی صورت میں بھی شاداب خان دستیاب ہوں گے۔
شاداب خان نے اب تک 33.33 کی اوسط سے 100 رنز بنائے اور 6 وکٹیں لے کر تھنڈر کے ٹاپ باؤلر ہیں۔
شاداب خان کا قومی ٹیم میں اپنی سلیکشن پر کہنا تھا کہ پاکستان ٹیم کی نمائندگی کرنا اور آنے والی سیریز کیلئے منتخب ہونا اعزاز ہے، تھنڈر کی جانب سے کھیلنے کا تجربہ شاندار ہے، دوبارہ واپسی کا انتظار نہیں کر سکتا، سیزن کے آخر میں دوبارہ واپس آ کر امید ہے ٹیم کو فائنل کی دوڑ میں شامل کرنے کیلئے مدد کروں گا۔
جی ایم تھنڈر ٹرینٹ کوپ لینڈ نے کہا کہ ملک کی نمائندگی ہمیشہ فخر کی بات رہی ہے، پاکستان کیلئے شاداب خان کو دوبارہ موقع ملا جس کیلئے پرجوش ہیں، نیک خواہشات شاداب خان کے ساتھ ہیں، سیزن کے اہم حصے کیلئے واپس آنے پر خوش آمدید کہیں گے۔
ان کا کہنا تھا کہ شاداب خان کے متبادل اوورسیز پلیئر کے لئے بات چیت حتمی مرحلے میں ہے۔
