بگ بیش لیگ، میلبرن سٹارز نے سڈنی تھنڈرز کو 9 وکٹوں سے ہرا دیا
کینبرا: (ویب ڈیسک) بگ بیش ٹی 20 لیگ (بی بی ایل) میں حارث رؤف کی میلبرن سٹارز نے شاداب خان کی سڈنی تھنڈرز کو 9 وکٹوں سے شکست دے دی۔
کینبرا میں کھیلے گئے میچ میں فاسٹ باؤلر حارث رؤف نے شاندار باؤلنگ کا مظاہرہ کیا جس کے باعث وہ پلیئر آف دی میچ قرار پائے، سڈنی تھنڈرز پہلے بیٹنگ کرتے ہوئے مقررہ اوورز کی آخری گیند پر 128 رنز بنا کر آؤٹ ہوگئی۔
شاداب خان نے سب سے زیادہ 25 رنز سکور کیے، جبکہ میتھیو جائکز نے 24 اور سیم بلنگز نے 23 رنز بنائے، میلبرن سٹارز کی جانب سے حارث رؤف نے 29 رنز کے عوض 3 وکٹیں حاصل کیں جبکہ مچل ویپسن، پیٹر سڈل اور مارکوس سٹوئنس نے 2، 2 کھلاڑیوں کو آؤٹ کیا۔
جوابی اننگز میں میلبررن سٹارز نے مقررہ ہدف انتہائی سہولت کے ساتھ محض 14 اوورز میں ہی حاصل کرلیا، کلارک 60 رنز کے ساتھ نمایاں بلے باز رہے جبکہ گلین میکس ویل 20 گیندوں پر 39 اور سیم ہارپر 29 رنز پر ناقابل شکست رہے۔
