کچے میں سندھ اور پنجاب پولیس کے گرینڈ آپریشن، 44 ڈاکوؤں نے سرنڈر کردیا
صادق آباد: (دنیا نیوز) کچے کے علاقے میں سندھ اور پنجاب پولیس کے گرینڈ آپریشن کے مثبت نتائج آنا شروع ہو گئے۔
پولیس کے مطابق کچے کے مختلف علاقوں میں کارروائیوں کے دوران 44 خطرناک ڈاکوؤں نے ہتھیار ڈال کر خود کو سرنڈر کر دیا ہے۔
پولیس کا کہنا ہے کہ سرنڈر کرنے والے ڈاکو اغوا برائے تاوان، ڈکیتی اور پولیس پر حملوں سمیت متعدد سنگین مقدمات میں مطلوب تھے جبکہ 40 سے زائد ڈاکوؤں کے سہولت کاروں کو بھی گرفتار کر لیا گیا ہے۔
ڈی پی او کے مطابق کچے کے علاقوں میں ڈرون کارروائیاں مسلسل جاری ہیں، آپریشن کے دوران تھرمل کیمروں، ڈرون سرویلنس، لانگ رینج اسلحہ اور بکتر بند گاڑیوں کا استعمال کیا جا رہا ہے۔
پولیس نے بتایا کہ کچے ماچھکہ میں کوش گینگ، سکھانی گینگ اور لونڈ گینگ جبکہ رونتی کے علاقے میں شر گینگ اور اندھڑ گینگ کے خلاف آپریشن جاری ہے، سرنڈر ہونے والے ملزمان کو سنگین نوعیت کے مقدمات کے لیے عدالت سے رجوع کرنا پڑے گا۔
پولیس حکام کا کہنا ہے کہ ڈاکوؤں کے مکمل خاتمے اور کچے کے علاقے میں پائیدار امن کے قیام تک یہ آپریشن بلا تعطل جاری رہے گا۔
