راشد محمود کی طبیعت ناساز، مداحوں سے دعاؤں کی اپیل
لاہور: (ویب ڈیسک) شوبز انڈسٹری کے سینئر اداکار راشد محمود نے طبیعت ناساز ہونے پر مداحوں سے دعاؤں کی اپیل کردی۔
سینئر اداکار راشد محمود جو شاہین، کاجل گھر، اندھیرا اُجالا، مرزا غالب، ریاست، محبت روٹھ جائے تو اور دیگر کلاسک ڈراموں میں اداکاری کیلئے مشہور ہیں، اداکار بنیادی طور پر منفی کردار کے لیے جانے جاتے ہیں۔
حال ہی میں راشد محمود نے مداحوں کے ساتھ ایک ویڈیو شیئر کی ہے جس میں انہوں نے اپنی بیماری کے بارے میں کھل کر بات کی، سینئر اداکار نے اپنی صحت کا بتاتے ہوئے مداحوں سے دعاؤں کی درخواست بھی کی۔
اداکار نے کہا کہ میں گزشتہ بیس دنوں سے بستر پر ہوں، میں پہلے ہی دل کا مریض تھا جب مجھے ورٹیبرا کے مسائل کی تشخیص ہوئی تو میں نے کئی علاج کروائے، پہلے مجھے ہسپتال کے ایمرجنسی ڈیپارٹمنٹ میں لے جایا گیا، جہاں میرے ٹیسٹ کیے گئے اب میرے موہروں کا مسئلہ ہے۔
راشد محمود نے کہا کہ علاج کے بعد کچھ چلنے کے قابل ہوا ہوں، میری مداحوں سے اپیل ہے کہ میری صحت یابی کے لیے دعا کریں تاکہ کچھ کام کرنے کے قابل ہوسکوں۔
