اقتصادی رابطہ کمیٹی نے کم لاگت ہاؤسنگ سکیم میں اہم ترامیم کی منظوری دیدی
اسلام آباد: (دنیا نیوز) اقتصادی رابطہ کمیٹی نے کم لاگت ہاؤسنگ سکیم میں اہم ترامیم کی منظوری دے دی۔
وزیر خزانہ محمد اورنگزیب کی زیر صدارت اقتصادی رابطہ کمیٹی کا اہم اجلاس ہوا، جس میں میرا گھر میرا آشیانہ اسکیم کے قرض کی حد 1 کروڑ تک بڑھانے کی منظوری دی گئی۔
اجلاس کے اعلامیہ کے مطابق کم لاگت گھروں کیلئے یکساں 5 فیصد مارک اپ مقرر کرنے کا فیصلہ کیا گیا، ہاؤسنگ فنانس کیلئے چار سالہ توسیعی اہداف منظور کئے گئے۔
اعلامیہ کے مطابق سٹیٹ بینک کے ذریعے سکیم پر عملدرآمد جاری رکھنے کی منظوری دی، ای سی سی نے پہلے سے جاری قرضوں کو بھی 5 فیصد شرح پر لانے کا فیصلہ کیا۔
ای سی سی اعلامیہ کے مطابق سبسڈی ادائیگیاں سالانہ مالی گنجائش کے مطابق ہوں گی، سستے گھروں کی فراہمی سے تعمیراتی شعبے اور روزگار میں اضافہ متوقع ہے۔
اعلامیہ کے مطابق بارانی علاقوں میں زرعی پیداوار بڑھانے کیلئے 72 لاکھ کی تکنیکی ضمنی گرانٹ اور تھر کول ریل کنکٹیوٹی منصوبے کیلئے ساڑھے 6 ارب روپے کی گرانٹ منظور کی گئی۔
ای سی سی اعلامیہ کے مطابق مقامی کوئلے کی ترسیل سے توانائی کے شعبے میں بہتری آئے گی، درآمدی ایندھن پر انحصار کم کرنے کی حکمت عملی کو تقویت ملے گی۔
