×

کھیل

دوسرے ٹیسٹ کے پہلے روز کا کھیل ختم، ویسٹ انڈیز نے پاکستان کیخلاف 239 رنز بنا لیے

بند کریں

پورٹ آف سپین: (دنیا نیوز) پاکستان اور ویسٹ انڈیز کے درمیان سیریز کے دوسرے اور آخری ٹیسٹ میچ کے پہلے روز میزبان ٹیم نے 5 وکٹوں کے نقصان پر 239 رنز بنا لیے۔

ویسٹ انڈیز کے خلاف دوسرے ٹیسٹ میچ میں شاہینوں کو سیریز بچانے کا چیلنج در پیش ہے، میچ کے پہلے روز میزبان ٹیم کے بیٹرز نے محتاط انداز میں بیٹنگ کی، پہلے روز کے کھیل کے اختتام پر ویسٹ انڈیز نے 5 وکٹوں کے نقصان پر 239 رنز بنا لیے۔

ویسٹ انڈیز کی جانب سے جسٹن گریوز 64 اور روسٹن چیز 36 رنز بنا کر کریز پر موجود ہیں، جبکہ برینڈن کنگ 46 اور عامر جنگو 26 رنز بنا کر آؤٹ ہوئے، اس کے علاوہ شائی ہوپ نے 29، ٹیگینرائن چندر پال نے 15 اور کیویم ہوج نے 10 رنز کی اننگز کھیلی۔

پاکستان کی جانب سے محمد علی نے 2 وکٹیں حاصل کیں، جبکہ عبید شاہ، علی عثمان اور ساجد خان کے حصے میں ایک، ایک وکٹ آئی۔

قبل ازیں میزبان ٹیم کے کپتان نے ٹاس اپنے نام کرنے کے بعد پہلے بیٹنگ کا انتخاب کیا تھا، پاکستان کی جانب سے ٹیم میں 4 تبدیلیاں کی گئی ہیں، عبداللہ شفیق، اویس ظفر، ساجد خان اور عبید شاہ کو ٹیم میں شامل کیا گیا ہے، جبکہ جبکہ ویسٹ انڈیز کی ٹیم میں کوئی تبدیلی نہیں کی گئی۔

پاکستان کی جانب سے عبید شاہ اور اویس ظفر ڈیبیو کر رہے ہیں، عبید شاہ کو محمد عباس جبکہ اویس ظفر کو بابراعظم نے ڈیبیو کیپ دی۔

دو ٹیسٹ میچوں کی سیریز میں ویسٹ انڈیز کو ایک صفر کی برتری حاصل ہے، ویسٹ انڈیز نے پہلے ٹیسٹ میں پاکستان کو 90 رنز سے شکست دی تھی۔