ایرانی پاسداران انقلاب کا آبنائے ہرمز میں امریکی بحری جہازوں کی پسپائی کا دعویٰ
تہران: (دنیا نیوز) ایرانی پاسداران انقلاب کے ترجمان حسین محبی نے دعویٰ کیا ہے کہ امریکی بحری جہاز آبنائے ہرمز سے 400 کلومیٹر دور منتقل ہوگئے ہیں، جسے انہوں نے ایرانی فوج کی کامیابی قرار دیا۔
حسین محبی کے مطابق واشنگٹن آبنائے ہرمز میں اپنے مقاصد حاصل کرنے میں ناکام رہا ہے، تاہم ایران کی جانب سے اعلان کردہ تمام 7 شرائط پوری ہونے تک امریکا کے ساتھ محاذ آرائی جاری رہے گی۔
ترجمان پاسداران انقلاب نے خبردار کیا کہ آئندہ ایران پر حملہ ہوا تو تہران جنگ کا جغرافیائی دائرہ تبدیل کردے گا اور مختلف ہتھیاروں سے مختلف اہداف کو نشانہ بنایا جائے گا۔
انہوں نے دعویٰ کیا کہ ایران کے پاس ایسی صلاحیتیں موجود ہیں جنہیں ابھی استعمال نہیں کیا گیا، جبکہ ایران اپنے مخالفین کی جانب سے نشانہ بنائے گئے اہداف سے کئی گنا زیادہ اہداف کو نشانہ بنا سکتا ہے۔
حسین محبی کے بقول ایرانی حملوں سے امریکی فوجی اور انٹیلی جنس تنصیبات کو شدید نقصان پہنچا ہے۔ انہوں نے واضح کیا کہ ایران کے اہداف ہمسایہ ممالک نہیں بلکہ امریکی پوزیشنز تھیں۔
Comments / رائے دیں
Share your thoughts. Comments are reviewed before they appear publicly.
Approved Comments