×

تفریح

سلمان خان کا جعلی اے آئی ویڈیوز بنانے والوں کو جیل بھیجنے کا مطالبہ

بند کریں

ممبئی: (ویب ڈیسک) بالی ووڈ سپر اسٹار سلمان خان نے مصنوعی ذہانت (اے آئی) کے ذریعے جعلی ویڈیوز بنانے اور پھیلانے والوں کے خلاف سخت قانونی کارروائی کا مطالبہ کردیا۔

بگ باس 20 میں گفتگو کرتے ہوئے سلمان خان نے اے آئی سے تیار کی جانے والی جعلی ویڈیوز کی مذمت کی اور انکشاف کیا کہ وہ خود بھی ایسی جعلی ویڈیوز کا نشانہ بن چکے ہیں۔

سلمان خان نے کہا کہ جان بوجھ کر جعلی اے آئی ویڈیوز تیار اور پھیلانے والوں کے خلاف قانونی کارروائی ہونی چاہیے۔ اے آئی کے ذریعے ویڈیو بنانا اور آواز ڈب کرنا غلط اور انتہائی سنجیدہ معاملہ ہے۔

انہوں نے کہا کہ اگر کوئی شخص حقیقت سے لاعلمی میں اے آئی سے تیار کردہ ویڈیو پوسٹ کرتا ہے تو معاملہ مختلف ہے، لیکن جو لوگ حقیقت جانتے ہوئے بھی جعلی مواد تیار کرتے ہیں، انہیں جواب دہ ہونا چاہیے۔

سلمان خان کا کہنا تھا کہ ایسے لوگوں کو جیل میں ڈالنا چاہیے، جب تک ایک دو افراد کے خلاف کارروائی نہیں ہوگی، یہ سلسلہ رکنے والا نہیں۔ انہوں نے سوشل میڈیا کے لیے مؤثر قانون سازی اور نگرانی کی ضرورت پر بھی زور دیا۔

بالی ووڈ اداکار نے کہا کہ جس طرح غنڈہ گردی اور خواتین کو ہراساں کرنے کے واقعات سوشل میڈیا ٹرولنگ کی شکل اختیار کرچکے ہیں، اسی طرح آن لائن پلیٹ فارمز پر لوگوں کو اپنی باتوں اور تیار کردہ مواد کے لیے جواب دہ ہونا چاہیے۔

سلمان خان نے عام لوگوں کو درپیش مشکلات کی جانب بھی توجہ دلائی اور کہا کہ مشہور شخصیات سائبر سیل سے رابطہ کرکے جعلی ویڈیو بنانے والے کا سراغ لگانے کی کوشش کرسکتی ہیں، تاہم عام افراد کے پاس ایسی سہولت اور وسائل موجود نہیں ہوتے۔

انہوں نے یہ گفتگو بگ باس 20 کے ہاؤس میں موجود شرکا کی جانب سے ایک دوسرے کی شکل و صورت سے متعلق کیے جانے والے تبصروں پر گفتگو کے دوران کی۔