×

کھیل

ٹیسٹ سیریز میں جنوبی افریقہ کی آسٹریلیا کو شکست،عالمی نمبر ون بن گئی

بند کریں

دربن:(دنیا نیوز) جنوبی افریقہ نے نیولینڈز میں کھیلی گئی تین ٹیسٹ میچوں کی سیریز کے فیصلہ کن مقابلے میں آسٹریلیا کو 176 رنز سے شکست دے کر سیریز 1-2 سے اپنے نام کرلی۔

اس کامیابی کے ساتھ ہی جنوبی افریقہ نے ٹیسٹ عالمی رینکنگ میں آسٹریلیا کو پیچھے چھوڑتے ہوئے پہلی پوزیشن بھی حاصل کرلی۔

فیصلہ کن ٹیسٹ میں جنوبی افریقی بولرز نے غیر معمولی کارکردگی کا مظاہرہ کرتے ہوئے آسٹریلوی بیٹنگ لائن کو مکمل طور پر بے بس کردیا۔

میزبان ٹیم کی جانب سے سپنر سائمن ہارمر نے دوسری اننگز میں کیریئر کی بہترین بولنگ کرتے ہوئے محض 16 رنز دے کر 6 کھلاڑیوں کو پویلین کی راہ دکھائی، جبکہ فاسٹ بولر کاگیسو ربادا نے ٹیسٹ کرکٹ میں 350 وکٹیں مکمل کرکے ایک اہم عالمی ریکارڈ اپنے نام کرلیا۔

آسٹریلیا ہدف کے تعاقب میں ناکام، پوری ٹیم 111 رنز پر آؤٹ

آسٹریلیا کو میچ جیتنے کے لیے 288 رنز کا ہدف ملا تھا، لیکن مہمان ٹیم جنوبی افریقی بولرز کے سامنے زیادہ دیر نہ ٹھہر سکی اور پوری ٹیم 111 رنز پر ڈھیر ہوگئی۔

آسٹریلوی ٹیم آخری روز جیت کی امید لے کر میدان میں اتری، تاہم اننگز کے پہلے ہی اوور میں دو اہم وکٹیں گرنے سے اس کی مشکلات میں اضافہ ہوگیا، ابتدائی نقصان کے بعد آسٹریلوی بلے باز سنبھل نہ سکے اور دیکھتے ہی دیکھتے سکور 62 رنز پر 8 وکٹوں تک پہنچ گیا۔

اس صورتحال کے بعد آسٹریلوی ٹیم کی جانب سے مزاحمت کی کوشش کی گئی، تاہم جنوبی افریقی بولرز نے مہمان ٹیم کو مزید سنبھلنے کا موقع نہ دیا اور چائے کے وقفے سے قبل ہی مقابلہ اپنے نام کرلیا۔

ربادا کی تباہ کن بولنگ، پہلے ہی اوور میں دو اہم وکٹیں

جنوبی افریقی فاسٹ بولر کاگیسو ربادا نے فیصلہ کن روز اپنی برق رفتار بولنگ سے آسٹریلوی ٹاپ آرڈر کو تہس نہس کردیا۔

انہوں نے اننگز کے پہلے ہی اوور میں میٹ رینشا کو بغیر کوئی رن بنائے وکٹ کیپر ریان ریکلٹن کے ہاتھوں کیچ آؤٹ کرایا، جبکہ مارنس لبوشین کو 4 رنز پر ایل بی ڈبلیو کردیا۔

ربادا نے بعد ازاں آسٹریلیا کے خطرناک بلے باز ٹریوس ہیڈ کو بھی آؤٹ کیا، جن کا کیچ مارکو یانسن نے گلی میں پکڑا۔

اس شاندار کارکردگی کے دوران ربادا نے ٹیسٹ کرکٹ میں اپنی 350 وکٹیں مکمل کرلیں، انہوں نے یہ اعزاز صرف 13 ہزار 808 گیندیں کرانے کے بعد حاصل کیا، جو گیندوں کی تعداد کے اعتبار سے 350 ٹیسٹ وکٹیں حاصل کرنے کا تیز ترین ریکارڈ ہے۔

اس سے قبل جنوبی افریقہ کے سابق فاسٹ بولر ڈیل اسٹین نے 14 ہزار 719 جبکہ پاکستان کے سابق کپتان اور عظیم فاسٹ بولر وقار یونس نے 14 ہزار 905 گیندیں کرانے کے بعد 350 ٹیسٹ وکٹوں کا سنگ میل عبور کیا تھا۔

سائمن ہارمر کی میچ وننگ کارکردگی

جنوبی افریقہ کی فتح میں سپنر سائمن ہارمر کا کردار بھی فیصلہ کن رہا، انہوں نے دوسری اننگز میں محض 16 رنز کے عوض 6 وکٹیں حاصل کرکے آسٹریلوی بیٹنگ لائن کی کمر توڑ دی۔

ہارمر کی اس کارکردگی نے نہ صرف جنوبی افریقہ کی فتح یقینی بنائی بلکہ انہیں میچ کے نمایاں ترین کھلاڑیوں میں شامل کردیا۔

جنوبی افریقہ کے لیے تاریخی کامیابی

آسٹریلیا کے خلاف سیریز میں 1-2 کی فتح جنوبی افریقہ کے لیے دوہری خوشی کا باعث بنی، کیونکہ اس کامیابی کے نتیجے میں پروٹیز نے ٹیسٹ عالمی رینکنگ میں بھی پہلی پوزیشن حاصل کرلی۔

اس طرح جنوبی افریقہ نے ایک جانب آسٹریلیا کے خلاف فیصلہ کن ٹیسٹ جیت کر سیریز اپنے نام کی، تو دوسری جانب ربادا کے ریکارڈ اور ہارمر کی غیر معمولی بولنگ نے اس کامیابی کو یادگار بنا دیا۔