سرینا ولیمز کی 44 سال کی عمر میں ٹینس کورٹ میں واپسی
کیلیفورنیا: (ویب ڈیسک) امریکی ٹینس لیجنڈ و سابق عالمی نمبر ایک سرینا ولیمز 44 سال کی عمر میں ٹینس کورٹ میں واپسی کے لئے تیار ہیں۔
23 گرینڈ سلیم سنگلز ٹائٹلز جیتنے والی سرینا کوئنز کلب ٹورنامنٹ کے ڈبلز مقابلوں میں کینیڈا کی نوجوان کھلاڑی وکٹوریہ مبوکو کے ساتھ ایکشن میں نظر آئیں گی۔
سرینا ولیمز نے تقریباً چار سال کے وقفے کے بعد مسابقتی ٹینس میں واپسی پر کہا ہے کہ اب انہیں کسی کے سامنے خود کو ثابت کرنے کی ضرورت نہیں بلکہ ان کی سب سے بڑی خوشی یہ ہے کہ ان کی بیٹیاں انہیں دوبارہ کورٹ میں کھیلتے ہوئے دیکھ سکیں گی۔
ان کا کہنا تھا کہ وہ واپسی پر کسی اضافی دباؤ کا شکار نہیں ہیں اور کھیل سے لطف اندوز ہونا چاہتی ہیں، انہوں نے اپنے کیریئر میں بے شمار کامیابیاں حاصل کی ہیں اس لئے اب جیت یا ہار ان کیلئے سب سے اہم چیز نہیں رہی۔
ان کے مطابق وہ اپنی زندگی میں اتنی فتوحات حاصل کر چکی ہیں جتنی اکثر لوگ پورے کیریئر میں بھی حاصل نہیں کر پاتے۔
انہوں نے یاد دلایا کہ پہلی بیٹی اولمپیا کی پیدائش کے بعد بھی وہ ٹینس میں واپس آئیں اور چار گرینڈ سلیم فائنلز تک رسائی حاصل کی،2023 میں پیدا ہونے والی ان کی دوسری بیٹی آدیرا نے ابھی تک اپنی والدہ کو پروفیشنل ٹور پر کھیلتے نہیں دیکھا ہے۔
سرینا نے مستقبل میں سنگلز مقابلوں میں واپسی کا امکان مسترد نہیں کیا تاہم کہا کہ فی الحال ان کی توجہ ڈبلز مقابلوں پر مرکوز ہے اور سنگلز کیلئے مزید تیاری درکار ہوگی۔
