امریکا میں پاکستانی سفارت خانے میں کرسمس کے حوالے سے خصوصی تقریب
واشنگٹن ڈی سی: (دنیا نیوز) امریکا میں پاکستانی سفارت خانے میں کرسمس کے حوالے سے خصوصی تقریب کا انعقاد کیا گیا۔
کرسمس کے پرمسرت موقع پر تقریب کے دوران کیک کاٹا گیا اور مسیحی برادری سے تعلق رکھنے والے سفارتی عملے کو تحائف پیش کئے گئے۔
اس موقع پر سفیر پاکستان رضوان سعید شیخ کا خصوصی پیغام میں کہنا تھا کہ امریکا، پاکستان اور دنیا بھر کی مسیحی برادری کو کرسمس اور نئے سال کی مبارکباد پیش کرتے ہیں، کرسمس صرف عیسائیت کے پیروکاروں کیلئے ہی نہیں بلکہ پوری دنیا کے لوگوں کیلئے خوشی کا موقع ہے۔
انہوں نے کہا کہ پاکستان کثیر الثقافتی، کثیر لسانی اور کثیر النسلی معاشرہ ہے جہاں کی سماجی، ثقافتی، مذہبی اور دیگر روایات ہزاروں سالوں میں پروان چڑھی اور پختہ ہوئی ہیں۔
ان کا کہنا تھا کہ اختلافات کی بجائے مشترکات پر مبنی شناخت اور تعاملات نہ صرف ہمارے آج کو بہتر بنائے گی بلکہ ہم آہنگی اور بین المذاہب بقائے باہمی کو بھی برقرار رکھے گی، تمام مذاہب کا احترام اور ایک دوسرے کی خوشیوں میں شریک ہونا انسانیت کے رشتوں کو مضبوط کرتا ہے۔
سفیر پاکستان نے کہا کہ ہم مسلمان اس بات پر یقین رکھتے ہیں کہ مسیح خدا کے برگزیدہ رسولوں میں سے ایک نبی تھے جو لائق تکریم ہیں۔
رضوان سعید شیخ کا کہنا تھا کہ اقوام متحدہ کی متعلقہ قراردادیں بین المذاہب ہم آہنگی کے حوالے سے عالمی اتفاق رائے کی نمائندگی کرتی ہیں اور انسانی حقوق کے عالمی طور پر تسلیم شدہ فریم ورک کے دائرہ کار میں منافرت کی حوصلہ شکنی کرتی ہیں، مسیحی برادری کو کرسمس کی خوشیاں مبارک ہوں۔
انہوں نے کہا کہ ہم دعا گو ہیں کہ نیا سال 2026 پوری دنیا کیلئے امن، ترقی اور خوشحالی لائے اور کرسمس کا جذبہ نہ صرف 2026 میں بلکہ آنے والے تمام مہینوں اور سالوں میں جاری رہے۔
