کرسمس اور قائد اعظم ڈے: پنجاب پولیس کا سکیورٹی پلان فائنل
لاہور: (دنیا نیوز) پنجاب پولیس نے کرسمس اور قائد اعظم ڈے کے حوالے سے سکیورٹی پلان فائنل کر لیا۔
ترجمان پنجاب پولیس کے مطابق لاہور سمیت صوبہ بھر کے 3583 گرجا گھروں کی سکیورٹی پر 30 ہزار پولیس افسران و اہلکار تعینات ہوں گے۔
صوبائی دارالحکومت کی 600 سے زائد مسیحی عبادت گاہوں پر 05 ہزار سے زائد پولیس افسران و اہلکار سکیورٹی کے فرائض انجام دیں گے۔
ترجمان پنجاب پولیس کے مطابق حساس گرجاگھروں کی مانیٹرنگ کیلئے 2832 سی سی ٹی وی کیمرے نصب کیے جائیں گے، گرجا گھروں میں چیکنگ کیلئے 4546 میٹل ڈٹیکٹرز بھی استعمال کیے جائیں گے۔
قائداعظم ڈے پر منعقدہ پروگرامز کی سکیورٹی پر 1 ہزار سے زائد پولیس اہلکار تعینات ہوں گے۔
آئی جی پنجاب ڈاکٹر عثمان انور نے کہا کہ کرسمس اور قائداعظم ڈے پر سکیورٹی ہائی الرٹ ہو گی، حساس گرجا گھروں پر اضافی نفری تعینات ہو گی۔
ڈاکٹر عثمان انور نے کہا کہ پولیس انتہائی الرٹ رہے، ملک دشمن عناصر و مشکوک افراد پر کڑی نظر رکھیں، سپروائزری افسران گرجا گھروں کی انتظامیہ سے مسلسل رابطے اور باہمی مشاورت سے سکیورٹی انتظامات یقینی بنائیں۔
آئی جی پنجاب نے کہا کہ تمام مکاتب فکر کے رہنما کرسمس پر بین المذاہب ہم آہنگی کا فروغ یقینی بنائیں، سیف سٹیز اتھارٹی کے کیمروں کی مدد سے کرسمس اور قائد اعظم ڈے تقاریب کی مسلسل مانیٹرنگ کی جائے۔
انہوں نے کہا کہ حساس گرجا گھروں اور اہم مقامات کی سکیورٹی پر کمانڈوز اور سنائپرز تعینات کئے جائیں گے، ڈولفن سکواڈ، پیرو، ایلیٹ پولیس کی ٹیمیں گرجا گھروں اور مسیحی آبادیوں کے اطراف موثر پٹرولنگ یقینی بنائیں۔
ڈاکٹر عثمان انور نے کہا کہ سی ٹی ڈی، سپیشل برانچ ٹیمیں قانون نافذ کرنے والے اداروں کے تعاون سے دہشت گرد و شر پسند عناصر کی سرکوبی کریں۔
آئی جی پنجاب نے تمام آر پی اوز، ڈی پی اوز، سی ٹی اوز کو سکیورٹی و ٹریفک انتظامات کی خود نگرانی کی ہدایت کی اور کہا کہ کرسمس سے قبل گرجا گھروں، مسیحی آبادیوں کے اطراف میں فلیگ مارچ، سرچ اینڈ سویپ آپریشن کئے جا رہے ہیں۔
انہوں نے کہا کہ کرسمس پر پارکوں، تفریحی مقامات، غیر ملکی سفارت خانوں سمیت تمام حساس تنصیبات کی سکیورٹی بھی یقینی بنائی جائے۔
ترجمان پنجاب پولیس کے مطابق کرسمس اور قائداعظم ڈے پر خواتین شہریوں کی چیکنگ کیلئے لیڈیز پولیس اہلکار بھی تعینات کی جائیں گی۔
گرجا گھروں کو حساسیت کے اعتبار سے اے، بی اور سی کیٹیگریز میں تقسیم کیا گیا ہے، اے کیٹیگری میں 164، بی کیٹیگری میں 360، سی کیٹیگری میں 3059 گرجا گھر شامل ہیں۔
