منفی پروپیگنڈے، فیک نیوز اور ڈس انفارمیشن کی حوصلہ شکنی وقت کی ضرورت ہے: عطا تارڑ
اسلام آباد: (دنیا نیوز) وفاقی وزیر اطلاعات و نشریات عطا اللہ تارڑ نے کہا ہے کہ پاک بھارت کشیدگی کے دوران ڈیجیٹل میڈیا نے مؤثر اور اہم کردار ادا کیا۔
عطا اللہ تارڑ کا کہنا ہے کہ منفی پروپیگنڈے، فیک نیوز اور ڈس انفارمیشن کی حوصلہ شکنی وقت کی اہم ضرورت ہے، فیک نیوز اور مس انفارمیشن جیسے چیلنجز سے نمٹنے کے لیے ذرائع ابلاغ، بالخصوص ڈیجیٹل میڈیا کے شعبے میں تعاون کو مزید وسعت دینا ہوگی۔
سی پیک میڈیا فورم سے خطاب کرتے ہوئے وفاقی وزیر نے کہا کہ پاکستان اور چین کی سٹریٹجک شراکت داری وقت کے ساتھ مزید مضبوط ہوئی ہے اور دونوں ممالک میڈیا سمیت مختلف شعبوں میں تعاون بڑھانے کے لیے پرعزم ہیں، پاکستان اور چین کی دوستی کو تاریخی، مثالی اور لازوال قرار دیتے ہوئے کہا کہ دونوں ممالک نے ہر مشکل وقت میں ایک دوسرے کا ساتھ دیا ہے۔
عطا اللہ تارڑ نے کہا کہ چین پاکستان اقتصادی راہداری (سی پیک) منصوبے نے نہ صرف معاشی ترقی کو فروغ دیا بلکہ اس کے معاشرتی اثرات بھی نمایاں ہیں، سی پیک ایک گیم چینجر منصوبہ ہے جو مختلف ممالک کو باہم جوڑنے کا باعث بن رہا ہے۔
وفاقی وزیر اطلاعات نے اس بات پر بھی زور دیا کہ موجودہ دور میں ڈس انفارمیشن اور فیک نیوز کے درمیان فرق کو پہچاننا ایک بڑا چیلنج بن چکا ہ جبکہ عالمی سطح پر پاکستان کا مؤقف مؤثر انداز میں اجاگر کرنے کے لیے ڈیجیٹل پاکستان ٹی وی کی بنیاد رکھی گئی ہے۔
