محسن نقوی کی فیصل کنڈی کو خیبرپختونخوا میں امن و امان کیلئے ہر ممکن تعاون کی یقین دہانی
اسلام آباد: (دنیا نیوز) وفاقی وزیر داخلہ محسن نقوی نے گورنر خیبرپختونخوا فیصل کریم کنڈی کو صوبے میں امن و امان کیلئے ہر ممکن تعاون کی یقین دہانی کرائی ہے۔
وفاقی وزیر داخلہ محسن نقوی سے گورنر خیبرپختونخوا فیصل کریم کنڈی نے اسلام آباد میں ملاقات کی جس میں خیبرپختونخوا میں امن و امان کی صورتحال پر تفصیلی تبادلہ خیال کیا گیا۔
گورنر خیبرپختونخوا فیصل کریم کنڈی نے صوبے کو درپیش سکیورٹی چیلنجز، بالخصوص سرحدی علاقوں میں سکیورٹی اقدامات اور خوارجیوں کے خلاف جاری آپریشنز سے وفاقی وزیر داخلہ کو آگاہ کیا۔
وزیر داخلہ محسن نقوی نے خیبرپختونخوا میں امن و امان کیلئے ہر ممکن تعاون کی یقین دہانی کرائی۔
اس موقع پر وفاقی وزیر داخلہ محسن نقوی کا کہنا تھا کہ خیبرپختونخوا میں قیام امن اولین ترجیح ہے، وفاقی حکومت اس ضمن میں ہر طرح سے سپورٹ کیلئے تیار ہے، دہشت گردی کے خلاف جنگ میں خیبرپختونخوا کے عوام کی قربانیوں کو قدر کی نگاہ سے دیکھتے ہیں۔
انہوں نے کہا کہ فتنہ الخوارج اور سہولت کاروں کا خاتمہ مشترکہ اقدامات سے کیا جا رہا ہے، خوارجیوں کے خلاف کسی قسم کی رعایت نہیں برتی جائے گی۔
گورنر خیبرپختونخوا فیصل کریم کنڈی کا کہنا تھا کہ صوبے میں امن وامان کے قیام کیلئے وفاقی تعاون ناگزیر ہے، دہشت گردی کے خاتمے کے لئے مشترکہ اور مربوط اقدامات کی ضرورت ہے۔
