محسن نقوی اور سرفراز بگٹی کا ایف سی بلوچستان نارتھ ہیڈکوارٹرز کا دورہ
کوئٹہ: (دنیا نیوز) محسن نقوی اور وزیراعلیٰ بلوچستان سرفراز بگٹی نے فرنٹیئر کور بلوچستان نارتھ کے ہیڈکوارٹر کا دورہ کیا، ایف سی بلوچستان نارتھ کے چاک و چوبند دستے نے معزز مہمانوں کو سلامی پیش کی۔
آئی جی فرنٹیئر کور بلوچستان نارتھ میجر جنرل محمد عاطف مجتبی نے وفاقی وزیر داخلہ اور وزیراعلیٰ بلوچستان کا استقبال کیا اور انہیں افسران سے تعارف کرایا۔
محسن نقوی اور سرفراز بگٹی نے یادگارِ شہداء پر حاضری دی، پھول رکھے اور فاتحہ خوانی کی، انہوں نے شہداء کے درجات کی بلندی کے لیے دعا کی اور ان کی لازوال قربانیوں کو خراجِ عقیدت پیش کیا۔
آئی جی ایف سی بلوچستان نارتھ نے فورس کی تربیت، آپریشنل تیاریوں اور پیشہ ورانہ صلاحیتوں کے بارے میں تفصیلی بریفنگ دی، اس موقع پر وفاقی وزیر داخلہ اور وزیراعلیٰ بلوچستان نے قیامِ امن کے لیے فرنٹیئر کور بلوچستان نارتھ کے گراں قدر کردار کو سراہا۔
وفاقی وزیر داخلہ محسن نقوی نے دہشتگردی کے خلاف جنگ میں ایف سی بلوچستان نارتھ کی قربانیوں کو خراجِ تحسین پیش کرتے ہوئے کہا کہ قیامِ امن کے لیے فورس کی قربانیاں انمٹ ہیں، فرنٹیئر کور بلوچستان نارتھ کے افسران اور جوانوں نے فتنہ الہندوستان کے خاتمے کے لیے ناقابلِ فراموش قربانیاں دی ہیں۔
اس فتنے کے مذموم عزائم ناکام بنانے میں شجاعت کی تاریخ رقم کی ہے، انہیں ایف سی بلوچستان نارتھ کے افسران اور جوانوں کی پیشہ ورانہ مہارت اور بہادری پر فخر ہے۔
وزیراعلیٰ بلوچستان سرفراز بگٹی کا کہنا تھا کہ ایف سی بلوچستان نارتھ کے سپوت بہادری سے بھارتی سپانسرڈ دہشتگردوں کا صفایا کر رہے ہیں اور بلوچستان حکومت دہشتگردی کے خلاف جنگ میں اپنی سکیورٹی فورسز کے شانہ بشانہ کھڑی ہے، اس موقع پر چیف سیکرٹری بلوچستان اور آئی جی بلوچستان پولیس بھی موجود تھے۔
