کراچی کا اربوں کا بجٹ اور پانی ٹینکروں میں ملتا ہے: حافظ نعیم الرحمان
کراچی :(دنیا نیوز) امیر جماعت اسلامی حافظ نعیم الرحمان نے کہا ہے کہ کراچی کے اربوں کے بجٹ کے باوجود نل کے بجائے ٹینکروں میں پانی ملتا ہے۔
شہرِ قائد کی نمائش چورنگی پر کارکنوں کے کیمپ میں میڈیا سے گفتگو کرتے ہوئے حافظ نعیم الرحمان کا کہنا تھا کہ آج پورے شہر میں کیمپس لگے ہیں اور ریلیاں نکالی جارہی ہیں، یہ اُمیدوں کا اظہار ہے،17 سال سے پاکستان پیپلز پارٹی کی حکومت ہے۔
اُنہوں نے کہا کہ 17 سال میں کوئی بڑا پراجیکٹ نہیں، 3 ہزار 360 ارب روپے کا بجٹ یہ کھا گئے، پانی نلکوں میں نہیں لیکن ٹینکرز میں آتا ہے۔
امیر جماعت اسلامی کا کہنا تھا کہ گل پلازہ کے سانحہ نے پوری قوم کو پریشان کردیا، فائر بریگیڈ کا عملہ دیر سے آئے ، پانی اور فائر کٹس بھی نہ ہوں، حکمرانوں کی نااہلی کی وجہ سے گل پلازہ کے دکان دار آگ میں جھلس گئے۔
حافظ نعیم الرحمان نے کہا کہ کراچی ٹیکس دیتا ہے تو پورا ملک چلتا ہے،یہاں کے بجٹ کو کرپشن اور نااہلی کی نذر کردیا ہے، پیپلزپارٹی کو ہمیشہ ایم کیو ایم کی طرح پارٹیوں کا تعاون رہتا ہے۔
اُن کا کہنا تھا کہ ایم کیو ایم اور پیپلزپارٹی عوام کو بے وقوف بنانے کے لیے فرینڈلی اپوزیشن کرتی رہتی ہیں، اختیارات عوام کے منتخب کردہ نمائندوں کے پاس ہونا چاہیے، اہل کراچی کو اب گھروں سے نکلنا ہوگا اور گلی گلی میں قبضہ سسٹم کے خلاف آواز اُٹھنا شروع ہوگئی ہے۔
امیر جماعت اسلامی نے کہا کہ ایک زبردست مزاحمت اور جدوجہد کرنے کی ضرورت ہے ورنہ یہ اسی طرح شہریوں کو مارتے رہیں گے، حکمران ہمارے ہی ٹیکسوں کے پیسوں سے ہماری ہی جانوں کو قربان کرتے رہیں گے۔
حافظ نعیم الرحمان کا مزید کہنا تھا کہ کراچی کے شہری چاہے وہ کسی بھی مکتبہ فکر سے وابستہ ہوں وہ مارچ میں ظالمانہ نظام کے خلاف بھرپور شرکت کریں، انہوں نے مطالبہ کیا کہ وزیر اعلیٰ سندھ مراد علی شاہ اور قابض میئر مرتضیٰ وہاب سانحہ گل پلازہ کے بعد استعفیٰ دیں۔
