چینی صدر کا برازیل کے ہم منصب سے رابطہ، دو طرفہ تعلقات کو فروغ دینے پر اتفاق
بیجنگ: (ویب ڈیسک) چینی صدر شی جن پنگ نے برازیل کے صدر لوئز انا سیو لولا ڈا سلوا کے ساتھ ٹیلی فونک رابطہ کیا جس میں دونوں رہنماؤں نے دو طرفہ تعلقات کو فروغ دینے کے لئے مل کر کام کرنے پر اتفاق کیا۔
عالمی میڈیا کی رپورٹ کے مطابق چینی صدر نے گفتگو کے دوران کہا ہے کہ 2024ء میں انہوں نے صدر لولا ڈا سلوا کے ساتھ مشترکہ طور پر اعلان کیا تھا کہ دوطرفہ تعلقات کو مشترکہ فائدہ مند معاشرے کے قیام کی طرف آگے بڑھایا جائے تاکہ ایک زیادہ منصفانہ دنیاقائم ہو اور زیادہ پائیدار ترقی کی جائے۔
میڈیا رپورٹ میں بتایا گیا کہ چینی صدر نے کہا کہ رواں سال چین کے پندرہویں پانچ سالہ منصوبے کے آغاز کا سال ہے، چین اعلیٰ سطح کے کھلے پن کے ذریعے اعلیٰ معیار کی ترقی کو فروغ دے گا اور چین براِزیل تعاون کے مزید مواقع فراہم کرے گا۔
ان کا مزید کہنا تھا کہ چین مختلف شعبوں میں باہمی فائدہ مند تعاون کو جامع طور پر آگے بڑھانے، چین برازیل تعلقات کی وسیع ترقی کو فروغ دینے اور ایک روشن مستقبل کے لئے برازیل کے ساتھ مل کر کام کرنے کے لئے تیار ہے۔
برازیلین صدر نے کہا کہ برازیل دو طرفہ تعلقات اور لاطینی امریکا اور چین کے تعلقات کی ترقی کو مزید فروغ دینے کے لئے چین کے ساتھ مل کر کام کرنے کے لیے تیار ہے۔
