برطانوی وزیراعظم کی سرکاری رہائشگاہ میں افطار پارٹی
لندن(آئی این پی)برطانوی وزیراعظم سر کیئر سٹارمر نے 10 ڈاوئننگ سٹریٹ کے دروازے مسلم کمیونٹی کے افطار کیلئے کھول دئیے ۔
وزیراعظم کی سرکاری رہائشگاہ 10 ڈاوئننگ سٹریٹ میں منعقدہ افطار میں شرکا کو روزہ کھولنے کیلئے کھجوریں پیش کی گئیں۔اس موقع پر کیئر سٹارمر کا شرکا سے خطاب کرتے ہوئے کہنا تھا کہ آج ملک کے متاثر کن برطانوی مسلم نوجوانوں کو افطار کیلئے خوش آمدید کہنے کا موقع ملا، ان کے ساتھ روزہ کھولنا میرے لیے اعزاز ہے ۔برطانوی وزیراعظم نے کہا افطار سے کمیونیٹیز کو متحد کرنے کیلئے مسلم کمیونٹی کے کام، غلط فہمیوں کو چیلنج کرنے اور نوجوانوں کو سپورٹ پر بات کرنے کا موقع ملا۔انھوں نے کہا کہ ڈاوئننگ سٹریٹ کی عمارت سے مسلمانوں کا بھی اتنا تعلق ہے جتنا کہ کسی اور کا، افطار میں لارڈ چانسلر شبانہ محمود، فیتھ منسٹر لارڈ واجد خان، لیڈر برینٹ کونسل ، محمد بٹ سمیت برطانوی فوج میں خدمات سرانجام دینے والی خواتین اور مختلف شعبوں میں اعلیٰ خدمات سرانجام دینے والے نوجوان بھی شریک ہوئے ۔
