سندھ کے چھوٹے بڑے شہروں میں سندھی ٹوپی،اجرک کی بہار
صوبہ سندھ کے ہر چھوٹے بڑے شہر میں سندھی ثقافت کا دن بھرپور جوش و جذبے سے منایا گیا،
کراچی(مانیٹرنگ ڈیسک) صوبہ سندھ کے ہر چھوٹے بڑے شہر میں سندھی ثقافت کا دن بھرپور جوش و جذبے سے منایا گیا،اس حوالے سے مختلف تقاریب اور ریلیوں کا انعقاد بھی کیا گیا۔سندھی ثقافت کے موقع پر مختلف شہروں میں تقاریب اور میلوں میں خواتین، نوجوان، بچے ، بوڑھے سب سندھی اجرک ٹوپی پہنے بھرپور انداز میں شریک ہوئے اور انہوں نے علاقائی گیتوں پر رقص بھی کیا،سندھی ثقافت کی سب سے مقبول چیز سندھی ٹوپی اور اجرک ہے جو نمایاں رہی، کراچی، حیدرآباد، سکھر، خیرپور، میرپور خاص، مٹیاری، دادو، نوابشاہ، لاڑکانہ، جیکب آباد اور پڈعیدن سمیت دیگر شہروں میں ریلیاں نکالی گئیں ۔ کراچی میں بھی پاکستان تحریک انصاف پارٹی کی جانب سے سندھی کلچر ڈے کی مناسبت سے ریلی نکالی ، جو انصاف ہاؤس سے گورنر ہاؤس پر اختتام پزیر ہوئی، ریلی کی قیادت پی ٹی آئی کے رہنما حلیم عادل شیخ نے کی۔رواں برس سندھی ثقافت کی تھیم ‘ایکتا’ رکھی گئی ہے جس کا مطلب اتحاد ہے اور اسی سلسلے میں مختلف شہروں میں گلی محلے اور بازاروں کو سندھی ثقافتی اشیا سے سجایا گیا ہے اور بچے بڑے سب ہی اپنی تہذیب و ثقافت سے محبت کا اظہار کر رہے ہیں۔ سندھی ٹوپی،اجرک
