چولستان میں گرین پاکستان منصوبے کا آغاز:کسانوں کی ترقی کا نیا سفر شروع:مریم نواز:پنجاب زرعی پاور ہاؤس بن گیا:آرمی چیف
بہاولپور ،لاہور(خبرنگار،کامرس رپورٹر،دنیانیوز) چولستان میں گرین پاکستان پروگراممنصوبہ کا آغازکردیا گیا ،کنڈائی اور شاپو کے علاقوں میں منصوبوں کی افتتاحی تقاریب کا انعقاد کیاگیا۔
گرین مال اینڈ سروس کمپنی، سمارٹ ایگری فارم، زرعی تحقیق اور سہولت مرکز کا افتتاح کیا گیا۔وزیراعلیٰ مریم نواز شریف اور چیف آف آرمی سٹاف جنرل سید عاصم منیرنے تقریب میں شرکت کی۔ مریم نواز شریف نے خطاب کرتے ہوئے کہاکہ چولستان اور پنجاب میں جدید زراعت کے انقلاب کی بنیاد رکھ دی ہے ،ان منصوبوں کا آغاز پنجاب کے کسانوں کی ترقی کے ایک نئے سفر کا آغاز ہے ،زراعت کی ترقی کسان کی ترقی اور پاکستان کی خوشحالی کی ضمانت ہے ۔انہوں نے کہاکہ گرین پاکستان جدید زراعت کے فروغ کا انقلاب ہے ، وزیراعلیٰ نے شہداء کے بچوں اور زخمی ہونے والے غازیوں کو زمین کی الاٹمنٹ کے خطوط بھی دئیے ۔ آرمی چیف جنرل سید عاصم منیر نے تقریب سے خطاب کرتے ہوئے کہاکہ پنجاب پاکستان کا زرعی پاور ہاؤس بن گیا،جدید زراعت میں صوبہ پنجاب اور یہاں کے کسانوں کاقائدانہ کردار قابل تحسین ہے ،گرین کارپوریٹ منصوبے کے تحت مختصر وقت میں یہ کامیابیاں حوصلہ افزااور ترقی کی نویدہیں۔
جنرل سید عاصم منیر نے کہاکہ فوج ملک کی معاشی ترقی کے عمل میں بھرپور حمایت جاری رکھے گی۔اجلا س میں بتایاگیاکہ منصوبے کے تحت گرین ایگری مال اینڈ سروسز سروس کمپنیکسانوں کو ان کے گھر کے دروازے پر معیاری بیج، کھاد، کیڑے مار ادویات رعایتی قیمت پر فراہم کرے گی، کسانوں کو ڈرونز سمیت زرعی مشینری رعایتی کرائے پر دستیاب ہو گی -ایک چھت تلے ، ایک کمپنی کے ذریعے کسانوں کو زراعت سے متعلق تمام سہولت میسر ہوں گی۔صوبائی وزیر زراعت و لائیوسٹاک سید عاشق حسین کرمانی نے کہاہے کہ چولستان میں گرین پاکستان اینی شیٹو وزیراعلیٰ مریم نوازشریف کے خواب کی تعبیر ہے ،گرین پاکستان اینی شیٹو کے تحت پراجیکٹ کے آغا ز سے چولستان کا صحرا اب سیراب ہوگا، چولستان میں کسانوں کو تمام زرعی اشیاء کی سرکاری ریٹ پر دستیابی کے ساتھ ہائی ٹیک مشینری رینٹل بنیادوں پر فراہم کی جائے گی،پنجاب کی ہر تحصیل میں رینٹل سروس کا آغاز کیا جائے گا۔
