فحاشی پر تھیٹر کو تین نوٹس پھر تاحیات پابندی لگے گی :عظمیٰ
لاہور(سٹاف رپورٹر)وزیراطلاعات پنجاب عظمیٰ بخاری نے گزشتہ روز کلچر رپورٹرز سے خصوصی ملاقات کے دوران صوبے میں تھیٹر اور ثقافتی سرگرمیوں کے فروغ کے حوالے سے اہم اعلانات کیے ۔
انہوں نے بتایا کہ پنجاب حکومت 17 اپریل کو کلچر ڈے بھرپور جوش و خروش سے منائے گی، جس میں وزیراعلیٰ پنجاب مریم نواز خود شرکت کریں گی۔تھیٹرز کے لیے نیا قانون آئندہ ہفتے متعارف کروایا جائے گا، انہوں نے کہا کہ میری خواہش ہے کہ تھیٹرز کا ماحول مکمل طور پر فیملی فرینڈلی ہو۔جو تھیٹر میں فحاشی کو فروغ دے گا، اسے پہلے تین نوٹس جاری کیے جائیں گے اور اس کے بعد پنجاب بھر میں تاحیات پابندی عائد کر دی جائے گی۔وزیر اطلاعات پنجاب نے مزید کہا کہ اگر ان کے محکمے کا کوئی افسر فحاشی پھیلانے والوں کا معاون ثابت ہوا تو اسے محکمہ سے فوری طور پر فارغ کر دیا جائے گا۔انہوں نے اعلان کیا کہ الحمرا لاہور میں جلد ایک نیا فیملی تھیٹر شروع کیا جا رہا ہے تاکہ معیاری تفریحی سرگرمیوں کو فروغ دیا جا سکے ۔ پنجاب سینسر بورڈ کو آئندہ دو سے تین روز میں ازسرنو تشکیل دیا جائے گا تاکہ ثقافتی اقدار کے تحفظ کو مزید موثر بنایا جا سکے ۔اس موقع پرڈی جی پی آر غلام صغیر شاہد، ڈی جی پکار تنویر ماجد اور ایگزیکٹو ڈائریکٹر الحمرا توقیر کاظمی بھی موجود تھے ۔
