مولانا حامد الحق حملہ میں دو دشمن ممالک کی ایجنسیاں ملوث
پشاور(نیوز ایجنسیاں، مانیٹرنگ ڈیسک ) جمعیت علمائے اسلام(س) کے سربراہ اور مدرسے کے نائب مہتمم مولانا حامد الحق حقانی شہید پر حملے میں ملوث گروپ کی نشاندہی ہوگئی۔
میڈیا رپورٹ کے مطابق اعلیٰ سرکاری ذرائع کا کہنا ہے کہ مولانا حامد الحق پر حملوں کی تحقیقاتی رپورٹ وزیراعظم شہباز شریف کو ارسال کردی گئی ہے ۔رپورٹ کے مطا بق 2 دشمن ملک انٹیلی جنس ایجنسیوں کی مدد سے عالمی دہشت گرد تنظیم نے مولانا حامد الحق کو نشانہ بنایا۔ مولانا حامدالحق پر حملے میں ملوث خودکش حملہ آور کی قومیت کی شناخت بھی کرلی گئی ہے ۔ غیرملکی خودکش حملہ آور مدرسے میں باہر سے داخل ہوا تھا۔آئی جی خیبرپختون خوا پولیس ذوالفقار حمید نے بتایا کہ مولانا حامد الحق شہید کیس کی تفتیش تیزی سے جاری ہے اور ان پر حملے کی منصوبہ بندی کرنے والے گروپ تک پہنچ گئے ہیں۔خیال رہے کہ 28 فروری 2025 کو نوشہرہ میں دارالعلوم حقانیہ اکوڑہ خٹک کی جامع مسجد میں نماز جمعہ کے بعد ہونے والے خود کش دھماکے میں مولانا حامد الحق حقانی سمیت 8 افراد شہید ہوگئے تھے ۔
